The Weather Diaries 2014-imili nunarsuup ilaani saqqummersinneqartarluni angalasimavoq. Silarsuarmi angalanermini kusanarluinnartunik nalilersorneqartarsimavoq, maannalu kiisami Nuummi takutinneqalerluni. Saqqummersitsineq aggustip aappaani nal. 17 Nuummi Eqqumiitsulianik Saqqummersitsivimmi ammaanersiorneqassaaq.
Eqqumiitsuliortut Sarah Cooper aamma Nina Gorfer atisanik ilusilersuisartut Savalimmiuni, Kalaallit Nunaanni Islandimilu pissutsinit, silaminngaanniit, pinngortitamiillu qanoq isumassarsiortarnersut misissuiffigalugit angalasimapput. Atisanik ilusilersuisartut katillugit 12-it nunani taakkunani pingasuneersut saqqummersitseqataapput, ilaatigut pikkorilluinnartut Bibi Chemnitz, Najannguaq Lennert, Nikolaj Kristensen aamma Jessie Kleemann ilaallutik.
Saqqummersitsinermi Nunat Avannarliit Killiini mutilerinerup inuiaqatigiinni inissisimanera siunertaalu misissorneqarpoq, ilaatigullu piujuartitsinissaq, sila aamma silap pissusaa, oqaluttuassalerineq, kulturikkut kingornussat, nutaaliornerup pilersarnera, kinaassuserlu ilanngullugit saqqummersitsinermi misissorneqarput. Saqqummersitsinermilu silarsuarni qalipakkatut ittuni assilissat alutornartut takuneqarsinnaalerlutik, assilissanit angisuunit oqaluttuat assigiinngitsorpassuit saqqummerarlutik.
Saqqummersitsineq Nordens Husimit, Reykjavikimiittumit kaamattuinikkut pilersimavoq. Saqqummersitassaq Nordic Fashion Biennalemi, Frankfurtimi Tysklandimiittumi, 2014-imi saqqumiussassanngorlugu suliarineqarsimavoq.
Eqqumiitsuliat atisanik ilusilersuisartut oqaluttuaannit, neriuutigisaannit anguniagaannillu tunngaveqarput, silarsuarni sinnattutut takorluukkatullu ittuni saqqummersinneqarlutik.
“Ukioq manna Nuummi saqqummersitsinerni tamani annersaavoq! Saqqummersitsineq una ukiuni arlalinni suliniutigisimavarput, maannalu kiisami iluatsilluni. Neriuutigaarput atisaliortarnermi eqqumiitsuliortarnermilu inuiaassutsikkut tulluussimaartarneq pillugu saqqummersitsineq nutaamik oqallititsilersinnaassasoq. Aamma neriuutigaarput sapangaaqqanik amminillu suliaqartariaatsinut tunngatillugu nutaaliornissamik saqqummersitsineq eqqarsartitsilersinnaassasoq. Atisanik ilusilersuisartut pikkorissut kalaaliulluni tulluusimaarnaqaat, silarsuillu takorluukkatut ittut isigalugit anersaaniffiginarluinnarlutik!” Nivi Christensen, Nuummi Eqqumiitsulianik Saqqummersitsivimmi aqutsisoq oqarpoq.
Assinik misissueqqissaarnermi oqaluttuassalerinermilu meeqqat atuarfiini atuartut suliassaat saqqummersitsinermut aamma ilaapput.
Saqqummersitsinerup ilaa Katuami aggustip aappaanit septembarip arfernganut saqqummersinneqassaaq.
Saqqummersitsineq qaammatini sisamangajanni sivisussuseqassaaq, piffissallu taassuma iluani saqqummersitsinermut tunngasunik aaqqissuussisoqartarumaarpoq.
Tips & Lottomidlerne aamma Kulturmidlerne aqqutigalugit Namminersorlutik Oqartussanit, Kommuneqarfik Sermersuumit aamma NAPA-mit taperseerujussuarnikkut saqqummersitsineq piviusunngortinneqarsinnaasimavoq.
Saqqummersitsineq novembarip 18-iata tungaanut takusarneqarsinnaassaaq.