Kommuneqarfik Sermersuumi Kommunalbestyrelsip ulloq 5. juuni 2018 ataatsimiinnermini »Kommunimut pilersaarummut tapiliussaq 2B2-4, Qeqertat 2020«, inaarutaasumik akuersissutigaat.
SIUNERTAQ
Kommunimut pilersaarummut tapiliussaq 2B2-4, Qeqertat 2020, aqqutigalugu nunaminertaq inuussutissarsiortunut aamma umiarsualiveqarfimmut atugassatut aalajangiunneqarpoq.
Kommunimut pilersaarummut tapiliussaq suliarineqarpoq Qeqertani umiarsualiveqarfimmi nunaminertani suliniutinut qinnuteqartut soqutiginnittut tunuliaqutaralugit, qinnuteqaatinik nassiussisut tassaallutik Usisaat Aps aamma ingerlatsiviit tallimat suleqatigiit: Royal Greenland, Aalborg Havn, STARK Kalaallit Nunaat A/S, Arctic Group aamma Blue Water A/S. Suliniutinut qinnutigineqartut soqutiginnittut tusarniaaffigineqarnerisa nalaanni suliniutaasinnaasoq alla Nuuk Bådparkimit nassiunneqarpoq/nunaminertat pillugit pilersaarutinut ilanngunneqartoq. Suliniutit qinnutigineqartut Ingerlatsivimmit suliamik ingerlatsiffiginerat Kommunalbestyrelsimit ulloq 21. novembari 2017, inaarutaasumik akuersissutigineqarput.
Kommunimut pilersaarummut tapiliussaq aqqutigalugu suliniutinut qinnuteqartut siunertaminnik piviusunngortitsinissaat periarfissinneqarpoq. Pilersaarut pillugu siunnersuutikkut aalajangersaasoqarpoq, nunaminertat siunertanut suliniutitut qinnutigineqartutut taamaallaat atorneqassasut, pilersaarut ataatsimoortoq aallaavigalugu ineriartortinneqassasut, tassunga
ilanngullugu sumiiffimmi atassuteqaatersuutit suliarinerat aamma sumiiffimmi takuneqarsinnaasut issusiat. Pilersaarutikkut ilanngullugu qulakkeerneqarpoq, siornatigut Nuummi containereqarfiup ineriartortinneqarneranut pilersaarut nanginneqassasoq, taassuma saniatigut nunaminertanik kommune imaluunniit kommunip ineriartortitsinermik ingerlatsiviutaanit nunaminertamik atoriaannaateqalissasoq aamma inuussutissarsiutinik allanik ineriartortitsisinnaalluni.
Kommunimut pilersaarummut tapiliussaq Kommunalbestyrelsip Nuummi inuussutissarsiortut inissisimaffiisa ataqatigiinnerannut pilersaarutaanut naapertuuppoq Kommuneqarfik Sermersuumi Illoqarfiit pingaarnersaannut pilersaarummut aamma kommunip pilersaarutaanut naapertuuttumik.
INATSISITIGUT ATUUTSITSINEQ
Kommunimut pilersaarutip imaluunniit kommunimut pilersaarummut tapiliussap akuersissutigineqarnera tamanut nalunaarutigineqareerpat, Pilersaarusiornermut inatsimmi § 30 innersuussutigalugu kommunimut pilersaarummi aalajangersakkanut naapertuutinngitsunik inatsisinut naapertuutinngitsunik imaluunniit pissutsinik allanik pilersitsisoqassanngilaq.
AKERLILIISSUMMUT ILITSERSUUT
Kommunalbestyrelsip aalajangiinera pillugu akerliliissuteqarusukkaanni, tamanna Naalakkersuisunut saaffiginnissutigineqassaaq: Naalakkersuisut, Aningaasaqarnermut Akileraartarnermullu
Naalakkersuisoqarfik, Nuna tamakkerlugu pilersaarusiortarnermut immikkoortortaqarfik, Postboks 1037, 3900 Nuuk.
Akerliliissummi saqqummiussap uuma saqqummiunneqarneraniit sapaatit akunneri arfineq pingasut qaangiutsinnagit tunniunneqareersimassaaq.
PILERSAARUT UANI TAKUNEQARSINNAAVOQ
Kommunimut pilersaarummut tapiliussaq kommunip nittartagaani sermersooq2028.gl, kommunimi innuttaasunik sullissivimmi imaluunniit Sanarfinermut Avatangiisinullu ingerlatsivimmut oqarasuaammut 36 74 00-imut sianerluni saaffiginninnikkut pineqarsinnaavoq.