Innuttaasunut

Eqqakkat Nuummut Danmarkimullu nassiunneqassapput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Paamiuni eqqakkanut ikuallaaveqanngimmat eqqagassat nalinginnaasut tamarmik Nuummut nassiunneqartarput.

Sap. ak. allortarlugu Paamiuniit Nuummut containeri 20 fodsiusoq eqqagassanik nalinginnaasunik ikuallanneqarsinnaasunillu eqqagassanik ulikkaarlugu nassiunneqartarpoq.

Facility supervisor Jonas Søndergaard Nuummi Eqqakkanik ikuallaavimmeersoq eqqagassalerisarnermi pissutsit takuniarlugit Paamiuneeqqammerpoq.

– Ukiumut 3-4-riarluta Paamiunukartarpugut. Nuummi suliffimmi pissutsit allanngortittarpavut illoqarfinnili allani taamaaliornissaq taamak ajornaatsiginngilaq. Eqqagassalerinerput ataavartumik tulluarsartarparput sulisullu eqqortumik ilisimasaqarnissaat suliassallu naammassinissaanut atortussaminnik peqarnissaat qulakkiissallugu pingaaruteqarpoq. Taamaattumik illoqarfinnut allanut pissutsinik misissuiniarluni angalasarneq pingaaruteqartorujussuusoq.

– Innuttaasunit suliffeqarfinniillu eqqakkat nalinginnaasut tigooraavinnukaanneqartarput tassanilu sulisunit tallimanit isumagineqarlutillu poortorneqartarlutik maanga Nuummut nassiunneqarniassammata, Jonas Søndergaard oqarpoq.

Eqqakkanik tigooraavimmi aqutsisoq Jens Petersen: – Eqqakkanik tigooraasaqaagut. Nalunaaqutaq arfineq-marlumut suliartortarpugut ullaakkut suliassat ataatsimiissutigeriarlugit suliassat aallartittarlugit. Ulloqartarpugut ulapittorujussuulluta. Eqqagassat immikkoortitertarpavut eqqagassat nalinginnaasuniit elektronikkinut uuliakullu. Eqqagassat ikuallanneqarsinnaasut containerinut poortoriarlugit Nuummut ingerlateqqinneqartarput.

Eqqakkat nalinginnaasut eqqakkallu ikuallanneqarsinnaasut Nuummut nassiussornerisa saniatigut eqqakkat assigiinngitsut Danmarkimut atoqqitassatut Paamiuniit toqqaanartumik nassiussassat immikkoortiterluarnissaat isumagineqartarput. Ullumi elektronik, pappit uuliakut eqqagassallu navianartut piffissat ilaanni Danmarkimut umiarsuakkut assartorneqartarput.

– Eqqakkat immikkoortiternissaanut pikkorinnerulernissaq sulissutigiuarparput eqqakkanillu tigooraavinni sulisut ikiorniarlugit iliuusissanik nutaanik ujartuiuarluta Jonas Søndergaard naggasiivoq.