Kommuneqarfik Sermersuumi borgmesterip Nuummi assammik arsarluni unamminissarsuaq ammarpaa oqalugiarluni. Oqalugiaataa uani atuaruk.
Kalaallit Nunaannut tikilluangaaritsi – qamannga pisumik Amerikap nunavittaani pissartanngorniunnermut maanga Nuummut, issittumi illoqarfiit pingaarnersaannut, tikilluaritsi.
Sapaatip-akunnera una tamatsinnut immikkuullarissuuvoq, Nuummi nunanit allanit amerlasuunit asseqanngitsuniillu tikeraartoqarneq uatsinnut immikkuullarissuuvoq; neriuppungalu issittumi imarpissuarmit sermersuarmillu avatangiisilik, Nuuk Kalaallit Nunaallu, tikeraarnissinni immikkuullarissumik misigisaqarfigiumaarissi.
Kalaallit Nunaanni Kalaallit Nunaata taaguutaa tassaavoq Inuit Nunaat, tassaniipporlu isumaa inuit Nunaat imaluunniit innuttaasut Nunaat, uagutsinnullu – Kalaallit Nunaanni innuttaasut – Nunarput nunarsuarmi tupinnarnerpaallunilu kusanarnerpaavoq. Silaannarinnerput, nillaarissumik silaannarinnera, imaq minguitsoq aammalu Issittumi anersaaq tassaapput nuannarilluinnakkavut. Neriuppungalu nuannarilluinnarumaarissi, neriuppungalu Kalaallit Nunaata anersaava sapaatip-akunnerani matumani malugiumaarissi, inuunissinnilu sinnerani sapaatip-akunnera una eqqaamajuaannassagissi; unamminerpassuit timersortarfimmilu pissanganartorsiornerit kisiisa pinnagit aaqqissuussarpassuit timersortarfiullu avataani pisut pillugit.
Pissartanngorniunneq nuannisarneruinnaanngitsoq ikinngutitaartornerinnaanngitsorlu nalunngilara. Assammik arsarneq nunarsuarmi piumasaqaatit annertuut malillugit ingerlanneqartoq isiginnaassavarput, PANAM-imilu unammisuni holdit pingasut angusarinnerpaat nunarsuarmi pissartanngorniunnissamut toqqaannartumik annguttussaapput. Allatut oqaatigalugu; ‘annaasinnaasat ikinngeqaat’, taamaattumik pissartanngorniunneq una assut pingaaruteqarpoq. Tamannalu pillugu assut pissangavunga.
Periarfissaq manna iluatsillugu The Pan-American Team Handball Federation qujaffigerusuppara ukioq maanna maani Nuummi pissartanngorniunnerup ingerlanneqarnissaanut periarfissiimmat. Neriuppungalu ilissi, peqataasullu tamarmik, maani Nuummi pissartanngorniunnerup ingerlanneqarnissaanut aalajangiineq torrallataasutut isigiumaarissi. Taamatuttaaq namminneq piumassutsiminnik sulisorpassuit, dommerit aaqqissuisullu Nuummi maani pissartanngorniunnermik piviusunngortitsisut, qutsavigerusuppakka – ajunnginnerpaamik kissaappassi qujanarlu Nuummi PANAM-imik pissartanngorniunnerup ingerlannissaa piviusunngortikkassiuk. Ilisseqanngippat maaniissanngikkaluarpugut.
Qujanaq.
Neriuppunga una sapaatip-akunnera inuunissi sinnerani misigisat pitsaanerpaat ilagiumaaraat – tikeraartutsinnullu oqassaanga: Ullut arlaanni nunarsuatsinni tupinnartumut issittumut tikeraaqqikkusukkussi sukkulluunniit Kalaallit Nunaannukarnissassinnut tikilluaqqusaangaarpusi.
Kalaallit Nunaanni ikinngutitaarisimasavut ikinngutitoqqagullu tikilluaqqusarpagut oqarluta Tikilluaritsi ullumikkullu ullormi immikkuullareqqissaartumi ilanngullugu oqarusuppunga – Welcome, Bienvenidos, Bem-vindos – Amerikap nunavittaani pissartanngorniunnermut 2018-imut aammalu assammik arsarnissamut pissanganarluinnartumut sapaatip-akunnerani ingerlanneqartussamut tikilluangaaritsi.