Peqatigiiffissi nittarsaanneqarnissaminut periarfissaqalerpoq – aningaasanillu eqquilluni.
Kommuneqarfik Sermersuup peqatigiiffiit imminnut nittarsaannissaminnut ikiorusuppai. Taamaammat naatsumik videoliakkut oqaluttuarisinnaanngorparsi peqatigiiffimmi sulerinerlusi, peqatigiiffiup suna siunertarineraa, peqatigiiffimmut qanoq ililluni ilaasortanngortoqarsinnaanersoq, sunaluunniit ilissi oqaluttuarerusutarsi.
Immiussaq minutsip ataatsip missaanik sivisussuseqassaaq, peqatigiiffissilu nittarsaannerani atorsinnaassavarsi. Kommuneqarfik Sermersuup immiussat katersussavai katiterlugillu, immiussat ataatsimut filminngorlugu peqatigiiffiit takusinnaaniassammassuk.
Immiussat torrannerpaat pingasut Kommuneqarfik Sermersuumi Peqqinnermut Sunngiffimmullu Immikkoortortaqarfimmit akissarsiassaqartinneqarput.
Akissarsiassat
Immiussaq torraanerpaaq 8.000 koruuninik akissarsitinneqassaaq.
Tullia 5.000 koruunit.
Pingajuat 3.000 koruunit.
Pisariaqartikkussiuk Nuummi Peqqinnermut Sunngiffimmullu Immikkoortortaqarfimmi, Imaneq 23-mi assiliivimmik attartorsinnaavusi.
Assiliivimmik digitaliusumik naliginnaasumik GoPro-milluunniit attartorsinnaavusi.
Immiussarsi kingusinnerpaamik 2. juli tigusimassavarput.
Immiussaq uunga nassiunneqassaaq peqatigiiffiit@sermersooq.gl.