Innuttaasunut

Mittarfik aningaasatigut naleqassutsimik ineriartortitsissaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ukioq kingulleq Kommuneqarfik Sermersuumi ulapaarfiusimavoq. Suliffeqarfiit aatsaat taamak amerlatigisut Nuummi aallartikkusullutik saaffiginnittarsimapput.

Akunnittarfiliorniartut, niuertut tunisassiortullu arlallit allaallumi nunani tamalaani qarasaasiatigut atortorissaarutinik suliaqartut ilaat maanna illoqarfiit pingaarnersaanni ingerlatsilersaarpoq.

Tamanna isumaqarpoq suliffiit 200 namminersortunit pilersinneqassasut akileraarutitigullu isertitatigut millionit koruunit uuntritilikkaat arlallit Kalaallit Nunaannut tuttussanngorlutik.

Nuup toqqarsimaneranik tamarmik assigiimmik tunngavilersuuteqarput. Illoqarfik Issittumi illoqarfittut pingaarnersaavoq nutaaliamik umiarsualiveqarluni nutaaliamillu mittarfittaartussaalluni.

Tamannalu illuatungilerlugu oqariartuut aamma taamak ersaritsigaaq. Mittarfissaq piviusunngunngippat Nuummi aningaasaliisoqarunnanngilaq.

Sapaatip akunnerata tulliani Inatsisartut periarfissaqarput takutissallugu, Kalaallit Nunaat suleqatissaasoq tutsuiginartoq. Kalaallit Airportsimik pilersitsinikkut nunarsuup sinneranut ersarissumik takutinneqarpoq, Kalaallit Nunaat ineriartorusuttoq avataaniillu aningaasaliisussanut ammasoq.

Mittarfiliortitsinissamut akuersilluni taasinikkut politikeritta takutissavaat, pilersaarusiorsinnaallutik tamannalu attassinnaallugu, Kalaallillu Nunaat nunaasoq aarlerissuteqarani aningaasaliiffigineqarsinnaasoq.

Kommuneqarfik Sermersuumi Aningaasaqarnermut Inuussutissarsiornermullu Ataatsimiititap mittarfiliortitsinissaq nunatsinni aalajangiinerit pingaarnerpaat ilaattut isigaat. Aningaasatigut naleqassutsimik ineriartortitsinermik aallartisartumik aningaasaleerusussuseqarnermillu ikorfartuinikkut nunarput aningaasatigut imminut napatissinnaalernissaa ataatsimoorluta qanillattorsinnaavorput.

Ataqatigiinnermut aaqqissussinernik inuussutissarsiornermillu ineriartortitsineq Kommuneqarfik Sermersuumi kommunalbestyrelsip ataatsimoorluni tapersersorpaa. Aningaasaqarnermut ataatsimiititami neriuutigaarput Inatsisartut ataatsimoorlutik isumaqatigissagaatigut.

Inussiarnersumik inuulluaqqusilluta

Kommuneqarfik Sermersuumi Aningaasaqarnermut Inuussutissarsiornermullu Ataatsimiititaq

Asii Chemnitz Narup (IA)

Uju Petersen, sinniisoq (IA)

Harald Bianco (IA)

Henrik Rachlev (IA)

Peter Davidsen (S)

Randi Vestergaard Evaldsen (D)

Jens Kristian Berthelsen (S)