Nuuk: Iggiaani puttasuliat D F-illu akornini biilinik inissiinissaamik inerteqqut biilertartunit arlalinnit takuenqanngitsoortarpoq.
Iggiaani puttasuliat D F-illu akornini biilinik inissiinissaamik inerteqqut, ullut tamaasa biilertartunit takuenqanngitsoortarpoq.
Ullumikkut unioqqutitsineq kinguneqartinneqartanngilaq, Kommuneqarfik Sermersuulli naatorsuutigaa qanittumi sullorsuaq biilertunut ammaqqissasoq, tamannalu pippat sangusarissap eqqaa biilinik inissiivigssallugu ulorianarsissaaq.
”Nuussuarmi umiatsialivimmiit sullorsuup tungaanut biilinik ingerlatillutit, takusinnaavat biilit aqqutaat pingasuusut. Aqqut talerperleq tassaavoq talerpimmut sullorsuarmut sanguniartut aqqutaat. Aqqut qiterleq saamimmut umiarsualiviup Sikukip tungaanut sangusussat aqqutissaralugu. Aqqut saamerleq biilinut illuata tungaanut ingerlasunoortuuvoq, tassani biilit lastbiilillu umiarsualivimmeersut talerpimmut sangusussat, biilillu sullorsuarmiit saamimmut sangusussat aqqutissaralugu,” Kommuneqarfik Sermersuumi ingerlatsinermut avatangiisinullu pisortaq Frank Rasmussen oqarpoq.
Tassanilu aqqummi saamerlermi biilertartut arlallit biiliminnik inissiisarput. Angallannermi nalunaaquttani takuneqarsinnaavoq puttasuliat D F-illu akornini biilinik inissiisoqarsinnaanngitsoq.
”Biilinik inissiisoqarsimatillugu navianartumik pisoqaratarsinnaavoq. Taamaammat biilertut unioqqutitsillutik inissiisimanersut politiinit nakkutigineqassaaq. Unioqqutitsillutik inissiisimanermik akiligassitsinnissat pinngitsoorniarlugu, biilitit allamut inissittariaqassavatit,” Frank Rasmussen oqarpoq.
Sangusarissami angallannerup isumannaatuunissaa Kommuneqarfik Sermersuumit ingerlaavartumik sulissutigineqarpoq, biilertut aqqutissaannik tikkuussisumik aqqusermi titartaanikkut.