Nuummi maajimi juunimilu eqqagassanik annertuunik katersineq

Kommuneqarfik Sermersooq illoqarfiit pingaarnersaanni maajimi juunimilu eqqagassanik annertuunik katersissaaq. Eqqanik angisuunit najukkavit eqqaanut aallertitsiniaruit Eqqakkanik Tigooraavik oqarasuaatikkut imaluunniit e-mailikkut attavigissavat.

Kommuneqarfik Sermersooq maajip juunillu ingerlaneranni innuttaasut eqqagaannik annertuunik aallersinnaanermik neqerooruteqaqqippoq.

Siusinnerusukkut eqqaavinnut angallattakkanut tunniussiartortarneq ineriartorteqqipparput, maannalu najugarisannut aggerluta eqqakkatit aasassavagut. Taama aaqqissuussineq TAAMAALLAAT namminneq pigisaminnik najugaqartunut/illoqartunut atuuppoq – inissiamik attartugaqaruit illuutileqatigiit attartorfigisatit aqqutigalugit allamik periarfissaqarputit.

Illoqarfik sumiiffinnut aalajangersimasunut pingasunut immikkoortitigaavoq. Nunap assingani takusinnaavat illit sorlermiinnerlutit:

1. Qinngorput (22.-24.maj aamma 12.-14.juni)
2. Nuussuaq (29.-31.maj aamma 18.-20.juni)
3. Nuuk (5.-7.juni aamma 26.-28.juni)

Eqqaavilerisut sapaatip akunneri pingasukkaarlugit ulluni pingasuni piffinnilu tamani, eqqakkanik angisuunik aallertassapput. Taamaattumik ukioq manna Nuummi eqqakkanik katersisoqarnissaanut containerinik ilioraasoqarnikuunngilaq, Eqakkanilli Tigooravimmut saaffiginnissaatit eqqakkanik angisuunik aasassaateqaruit. Eqqanik angisuunit najukkavit eqqaanut aallertitsiniaruit Eqqakkanik Tigooraavik oqarasuaat 36 74 11 imaluunniit e-mail affald@sermersooq.gl atorlugu attavigissavat.

Siusinaarlutit Eqqakkanik tigooraavik attavigisinnaagukku, aallerfissatut piffissaq kissaatigisat eqqorlugu aallertoqarnissaanut periarfissaqarnerussaaq. Avatangiisinut biiliutivut ulluni taaneqartuni nalunaaqutaq 17-21 akornanni angalaassapput.

Attavigigutsigut uku paasissutissiissutigissavatit:

  1. Ateq aamma najugaq
  2. Mobiltelefonnormu
  3. Eqqakkat suut igitsinniarpigit – qanoq annertutigippat

Eqqakkat tunniussassatit eqqagassanut assigiinngitsunut immikkoortiterneqarsimassapput:

  • Saviminikut saffiugassallu igitassat
  • Ikumasinnaasut – ikumasinnaasut mikisut puunut poortorneqarsimassapput
  • Ikumasinnaanngitsut
  • Elektronikkimut tunngasut
  • Qalipaatit sinnerit akoorutissallu kemikaliat

Eqqagassat aqquserngup sinaanut ulloq aallerfissaq nallertinnagu inississanngilatit.  Tikiukkutta eqqagassat eqqaaniissaatit. Eqqagassat aqquserngup sinaanut iliinnakkat tigussanngilagut.

Lastbiilit takkuppata usisarfianut eqqakkatit illit nammineq qaqissavatit.  Aquttup ilitsersorsinnaavaatit eqqakkat qanoq immikkoortiterneqarsinnaanersut. Eqqagassat isumannaatsumik poortorneqarsimassapput, passunnerat isumannaatsooqqullugu – ilinnut sulisunullu.

Illit imaluunniit illuutileqatigiit attartorfigisat (piginnittut imaluunniit piginneqatigiiffik) najugaqarfissi eqqaani eqqagassanik katersinermik aaqqissuusserusukkuit/-ppata, ulluni taaneqareersuni aamma aggeqqusinnaavatsigut, taava avatangiisinut biilit aggerlutik eqqagassat katersasi aassavaat. Eqqaamassavarsilu eqqagassat immikkoortiterneqarsimassammata.

Sermersuumi Eqqakkanik tigooraavik
affald@sermersooq.gl
Tlf. 36 74 11

Ataasinngornermiit tallimanngornermut (Nalliuttuniunngitsoq) Sermersuumi Eqqakkanik tigooraavik sianerfigisinnaavat.

Nal. 10-12 akornanni pissarsiarineqarsinnaavugut.

Oqarasuaatikkut anngunneq ajuleruit inniminniissutit e-mailikkut nassiuguk.

Ulloq aallerfissaq tikillugu eqqakkat angisuut aatinnissaannut inniminniisinnaavutit. Ulluni aallerfiusuni nalunaaqutaq 21.00 tikillugu sianersinnaavutit.

Piffissaqartilluta ullormi/unnummi pineqartumi angisuunik eqqagassaatitit aasinnaavagut.