Nuummi Katersugaasiviit Ulloqartinneqarnerat

Tallimanngorneq maajip 18, 2018 Nunani Tamalaani Katersugaasiviit Ulluat ingerlanneqaqqilerpoq. Tamanna malunnartinniarlugu Nuummi Eqqumiitsulianik Saqqummersitsivikulloq taanna aamma ullup nallernissaanut sapaatip akunneranik sioqqutsilluni arlalinnik aaqqissuussaqarpoq.

Katersugaasivik qanoq nipeqarpa? Eqqumiitsuliat sunik misigilersitsisarpat? Nuummi Eqqumiitsulianik Saqqummersitsivik ulluinnarni sulinermini silarsuaq qanoq angutigisarpaa? Eqqumiitsuliat Kalaallit Nunaata eqqumiitsuliornermik oqaluttuarisaaneranut ilaasut qanoq saqqummersinneqarlutillu ingerlateqqinneqartarpat?

Eqqumiitsuliat nipilerlugit
Siorna eqqumiitsulianik saqqummersitsiviup katersugaatit nipilersuutitassaat (podcasts) marluk suliaritippai. Saqqummersitsivimmi sapaatip akunnera tamaat tusarnaagassiaq ”Nipit” sammineqassooq. Tusarnaagassiat saqqummersitsivimmi inini assigiinngitsuni katersugaatinut nipitaritinneqartussatut pilersitaapput. Nipit, eqqumiitsulianik immaqa allatut isigilersitsisinnaasut. Tusarnaagassiat nipitalersuisartumit Siri Paulsenimit suliaapput.

Saqqummersitsivik ataasinngornermit tallimanngornermut 5-8 klassinut nipinik workshoppertitsisassooq, tassani atuartut namminneq eqqumiitsulianut nipitalersuinermik misileraasinnaallutik. Nalunaarnissaq pisariaqarpoq, paasissutissallu facebookkimi saqqummersitsiviup nittartagaani takuneqarsinnaapput.

Nuummi Eqqumiitsulianik Saqqummersitsivik silarsuarmi
Nunani Tamalaani Katersugaasivii Ulluat nalliuttorsiutigineqassooq, qulequtaralugu ”Hyperconnected museums: New approaches, new publics”.

Saqqummersitsivimmi sapaatip akunnera tamaat nunarsuup assinga nivingatinneqassooq. Tassani takuneqarsinnaassapput qaammatip ataatsip iluani (18. april – 18. maj) saqqummersitsiviup nunarsuarmi attaveqarfigisimasai. Nuummi Eqqumiitsulianik Saqqummersitsiviup Kalaallit Nunaanni assigiinngitsorpassuit suleqatigisarpai, aammali nunap avataaneersut assigiinngitsorpassuit suleqatigisarlugit. Saqqummersitsivik assigiinngitsorpassuarnit saaffigineqartarpoq, saaffiginnittuusarlunilu, Kalaallit Nunaanni avataanilu.

Katersugaasiviit ulluat
18. maaji, nal 16.00,Nuummi Eqqumiitsulianik Saqqummersitsivimmi pisortaq, Nivi Christensen, saqqummiussissooq. Ataatsimeersuarnerit, soorlu Københavnimi, Stockholmimi aamma Oxfordimi peqataaffigisimasat ilaatigut tunngavigalugit saqqummiussissooq, ulluinnarnilu saqqummersitsivimmi suliassaasartut, eqqarsaataasartut aaliangersorneqartartullu sammillugit.

Sapaatip akunnera tamaat iserneq akeqanngilaq. Tusarnaagassiaq saqqummersitsivimmi atorneqarsinnaavoq.

Saqqummersitsivik marlunngornermit sapaammut ammassooq nal. 13-17, sisamanngornermilu nal. 13-19.