Poul Møller Nuummeersoq Kommuneqarfik Sermersuumi Suliffissarsiuussisarfimmi sullissisutut sulivoq. Eqqartuussisutut sulisimavoq massakkullu toqqammaviusutut sulinermi saniatigut eqqartuusseqataasarluni.
– Eqqartuusseqataasartutut eqqartuussinerup ingerlasarnera ilisimaarivara aamma toqqammaviusussanik pisariaqartitsineq ilisimavara. Ukiut pingasut matuma siorna toqqammavigisassatut sulerusunnerlunga aperineqarama angerpunga.
– Inunnut marlunnut toqqammaviuvunga. Suliffimmi pingaarnerpaavoq sullitap pisortanut, kommunimut, Pinerluuteqarsimasunik Isumaginnittoqarfiullu akornanni attaveqaataanissaq.
Toqqammavigisaasutut sulinermi suut unamminartuuppat?
– Sulineq kiserliornartutut misinnarsinnaavoq. Qujanartumilli suleqateqarpunga uattulli toqqammaviusutut sulisoq taannalu oqaloqatigisinnaasarpara. Toqqammaviusartut peqatigiiffeqaraluarpata iluaqutaassagaluarpoq. Dansk Bistandsværgeforeningimut ilaasortanngorsimagaluarpunga taakkunaniilli tusagaqanngisaannarpunga. Najukkami peqatigiiffeqarnikkut ilisimasanik paasissutissanillu avitseqatigiittarnissaq iluassagaluarpoq.
– Sullitat tarnimikkut nappaateqarsinnaasarmata toqqammavigisaasutut tatitunissaq pingaaruteqarpoq. Pinerluttulerinermi eqqartuuseriaaseq pillugu nalinginnaasumik ilisimasaqarnissaq aamma pingaaruteqarpoq.
Toqqammavigisaasutut suna nuannernersaava?
– Inunnik allanik ikiuineq pisunillu ingerlalluartoqaraangat iluatsittoqaraangallu nuannertaqaaq.
Suliffeqarnermut Isumaginninnermilu ingerlatsivimmi fagchef, Sofia Rossen oqarpoq, siunissami toqqammaviusunut pikkorissarneq ingerlanneqartalissasoq.
– Kalaallit Nunaata Eqqartuussivianiit eqqumaffigineqarpoq siunissamilu toqqammaviusunut ilinniartitseqqinnerit ingerlanneqartalissapput.
Sooq pingaaruteqarpa toqqammaviusunik peqarnissaq?
– Toqqammaviusup suliassaa tassaavoq suliamut tunngatillugu ikiuisinnaanissaq, katsorsartinnissamut pineqaatissinneqarsimagaanni. Paragrafit eqqaamasassallu eqqumaffigineqartariaqarput, toqqammaviusullu taakkununnga ikiuutaalluarsinnaapput. Toqqammaviusut katsorsartinnissamut pineqaatissinneqarsimasumut oqaaseqartartuusussaavoq, Sofia Rossen oqarpoq.