Innuttaasunut

Kiffartuussinermik misissuineq: Tasiilami sulisut siunnersuutiinik kissaatinillu saqqummiipput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersooq aamma konsulenthuset Deloitte Tasiilami misilittakkanik siunnersuutinillu sapaatip akunnerini kingullerni katersipput. Tassani anguniagaalluni Tunumi illoqarfiit annersaanni kommunip aaqqissuussaaneranik pitsaanerulersitsinissaq. Kommunimi sulisut 90-it sapaammi katersuupput oqallillutillu workshopperput.

Sapaatip akunnera anorersuartarlunilu sila unerisimanngereersoq sapaammi Kommuneqarfik Sermersuup ingerlatsiviini tamaneersut sulisut 90-it Tasiilami kommunip aaqqissuussaaneranik pitsanngorsaataasinnaasunik nukittorsaataasinnaasunillu illoqarfimmiut isummanik avitseqatigiisitsinissamik siunnersuuteqartitsinissamillu siunertaqartumik katersuutitikkaalu seqinnilerpoq.

Sapaatip akunnerata ingerlanerani Helene Horsbrugh, Kommuneqarfik Sermersuumi Meeqqanut Ilaqutariinnullu Ingerlatsivimmi ineriartortitsinermut pisortaasoq aamma konsulenthuset Deloitte-meersoq nikittaallutik aqutsisut sulisullu 20-nit amerlanerusut naapeqatigaat, tassani siunertaalluni sapaatit akunnialuini kingullerni illoqarfik pillugu suliniutaasumut nalunaarusiornissamut paasisassarsiorneq isumassarsiornerlu.

Aammattaaq suleqatigisartakkat inuussutissarsiortullu kiisalu innuttaasut sinnerlugit inuit 25-t miss. ulluni kingullerni tusarniarneqarput. Tassani ilaatigut tassaallutik Paarnaarussivimmi sulisut, Røde Korsimi siulersuisunut ilaasortat, assassornermik suliallit, pisinniarfiutillit, Destination East Greenland, erinarsoqatigiit, palasi, najukkami ataatsimiititaliaq aamma kommunalbestyrelsimut ilaasortat illoqarfimmi najugallit.

”Sapaatip akunnerani saqqummiussagut tigulluarneqaqaat. Tasiilami ataatsimuussuseqarneq piumassuseqarnerlu malunnarpoq,” Helene Horsbrugh oqarpoq.

Pitsanngorsaarusunneq

Sapaammi workshoppertoqarnerani erinarsoqatigiittoqarlunilu nipilersortoqarpoq, minnerunngitsumilli oqallittoqarlunilu isumassarsiortoqarpoq. Sulisut Tasiilameersut nalunaarusiornermut ilanngussassanik sapaat atorlugu maluginiarsimasanik siunnersuutinillu 250-inik tunniussaqarput.

Aalajangerneqarsimasunut tunngatillugu, Tasiilami sutigut aalajangiisoqarsinnaanera suullu Nuummiissanersut pillugit ersarinnerusoqartariaqarnera amerlasuunit allanneqarsimavoq. Inuusuttut illoqarfimmeersut ilinniagaqarnissaannut suliffeqalernissaannulluunniit qanoq iliortoqarsinnaanersoq kingusinnerusukkut eqqartuisoqarpoq.

”Sulisut oqariartuutaat pitsaasut amerlaqaat. Siullertut pingaarnerusumillu maluginiarpara illoqarfitsik nuannarigaat. Tamanna takunngitsoorneqarsinnaanngilaq.

Immikkoortortat iluminni nalinginnaasumik suleqatigiinneq pillugu oqariartuutaat pitsaasuupput. Taamaattorli soorunami aamma uagut pitsanngoriaatigisinnaasatsinnik kissaatigisaqarlutik. Kissaatigineqartut ilaat tassaavoq Tasiilami aaqqissuussaanermut tamarmiusumut aqutsisoqalernissaq. Taakku saniatigut kissaatigineqarpoq, immikkoortortat akornanni suleqatigiinnerulernissaq. Tasiilami sulisut aamma amigaatigaat, aaqqissuussaaneq tamaat isigalugu Nuummi aalajangerneqartunik kommunimut tamarmut ingerlateqqinneqartarnissaat – tassunga Tasiilaq ilanngullugu,” Helene Horsbrugh oqarpoq.

Tasiilamut angalanermi ataatsimut isigalugu pissarsiat tunngavigalugit konsulenthuset Deloitte aamma Kommuneqarfik Sermersooq nalunaarusiussapput. Nalunaarsiaq tunngavigalugu Tasiilami kommunip nutaamik aaqqissuunneqarnissaanut siunnersuusiortoqassaaq. Siunnersuullu tunngavigalugu kommunimi pisortaqatigiit aalajangiissapput.

Kommuneqarfik Sermersuumi pisortaqatigiit Tasiilami sapaammi workshoppertoqarneranut silarlunnera pissutigalugu anngutinngitsoorput. Tassunga taarsiullugu maajimi Tasiilaliassapput.

Tasiilami kiffartuussinermik misissuinermi pingaarnerusortaa marlunngornermi unnukkut pissaaq, tassa innuttaasut kikkulluunniit timersortarfimmi innuttaasunik ataatsimiititsisoqarnissaanut qaaqquneqarput. Tunumi illoqarfiit annersaanni pissutsinik pitsanngorsaanissamut isumassarsiortoqarlunilu siunnersuuteqartoqarsinnaavoq.