Innuttaasunut

Pinnguarnermi aaqqissuisut maligassiuilluartut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Tasiilami Alivarpi pinnguarnermi aaqqissuisunik pilersitsisimavoq. Pinnguarnermi aaqqissuisut atuarfiup pinnguartarfiani pinnguarnermi aaqqissuisassapput, tamannalu akerleriinnernik nugusaataallunilu anitsiarnermi nuaannaarnerutitsivoq.

Tasiilavmi Alivarpimmi 7. aamma 8. klassemi atuartut 13-it, 2017-imi ukiaanerani pinnguarnermi aaqqissuisutut pikkorissaqataapput. Pikkorissartitsineq novembarimi arfininngornerni marlunni ingerlanneqarsimavoq, tamatumalu kingorna pinnguarnermi aaqqissuisut atuarfiup pinnguartarfiani sulilersimallutik.

Pinnguarnermi aaqqissuisut atuarfiup pinnguartarfiani pinnguarnernik assigiinngitsunik aaqqissuisarput. Pinnguartarfiup ilaani meeqqat høvdingimik pinnguartarput, allat arsartut allallu pattaattut.

“Anitsiarnerup  nalaani meeqqat akornanni aporaattoqannginnerunera meeqqallu nuannaarnerulernera ilinniartitsisutut maluginiarsimavarput. Pinnguarnermik aaqqissuisut meeqqanit tigulluarneqarsimaqaat. Tamanna iluatsitsineruvoq annertooq.,” Tasiilami Alivarpimmi ilinniartitsisoq, ilinniartitsisorlu Puite Josvassen ilagalugu suliniummi aaqqissuisuusoq, Anette Broman Mølbæk oqarpoq.

Ilimagisamit iluatsilluarnerusoq

1. klassemiit 6. klassemi atuartut ullut tamaasa atuarfiup pinnguartarfiani anitsiartarput. Pinnguarnermi aaqqissuisut eqimattanut marlunnut agguarneqarsimapput sapaatillu akunnerata ingerlanerani anitsiarnerit amerlanerit suliffigisarlugit.

”Pinnguarnermi aaqqissuisut tunniusimanerat, sulerusussuseqarnerat ataqatigiinnerallu suliniummut ilimagisatsinnit anneroqaat. Suleqatigiit suna tamaat aaqqissuuttarpaat, namminerlu taartaasussat isumagisarlugit ullullu tamaasa pinnguaatinik nassaarniartarlutik,” Puite Josvassen oqarpoq.

Pinnguarnermi aaqqissuisut ataasinngornerit tamaasa ataqatigiissaarisunik ataatsimeeqateqartarput. Tassani pinnguarnermi aaqqissuisut sulinerminni nalaatatik aporfigisarsimasatilluunniit oqaluttuarisarpaat.

”Meeqqanut taamak amerlatigisunut maligassiuisutut inissisimanerup pikkunassusaa pinnguarnermi aaqqissuisut oqaluttuarikkajunnerusarpaat. Meeqqat allat qanoq ataqqitigigaatsik qanorlu asanninnermik takutitsivigisartigigaatsik oqaluttuarisarpaat,” Anette Broman Mølbæk oqarpoq.

Pinnguarnermi aaqqissuisut ilisariuminartut

Atuarfiup pinnguartarfiani pinnguarnermi aaqqissuisut ilisariuminartuaannarput. Tamarmimmi pinnguarnermi aaqqissuisut tujuuluannik qorsuusumik atugaqartarput. Ilisariuminartunik aaqqatissaannik Tasiilami Alivarpi qanittumi aamma pisissamaarpoq. Pinnguarnermi aaqqissuisut aamma nammineerlutik pinnguaqarput.

Tasiilami Alivarpimmi aningaasaliisarfik Pinnguarnermi Aaqqissuisunut 5000 koruuninik aningaasaliisimavoq. Tallimanngorneq 15. december, pinnguarnermi aaqqissuisut siullermeerlutik unniussiuaaqatigiipput, tassani nereqatigiikkamik, pinnguarlutik, qittallutik unammisitsillutillu. Ukuip affaa qaagiuppat aasaanerani naggataarnersiortoqalerpat, ukiup ingerlanerani sulisimanerminni pikkorissarnernullu peqataasarsimanerminni pinnguarnermi aaqqissuisut diplominnatsinneqassapput.

Atuartut anginerit amerlasuut suliniummut ilaarusullutik nalunaartarsimapput. Tamannalu peqqutigalugu pinnguarnermi aaqqissuisunut ilaasortanut nutaanut, atuarfik pikkorissaatitsinissamik ulloqartitsiniarpoq. Tamanna pissaaq arfininngornermi 27. januar. Ilaasortanik nutaanik pikkorissaanermik ulloqartitsinermik pilersaarusiorneq ingerlatsinerlu, siulliullutik pinnguarnermi aaqqissuisuusimasunit peqataaffigineqassaaq. Tamatuma saniatigut marlunngornermi 23. januar atuartunut angajoqaanullu soqutigininnittunut paasisitsiniaasoqassaaq.

Pinnugarnermi aaqqissuisut ukuupput: Iddimanngiiuk Jensen, Nikkulaavaraq Boassen, Kristian Viberg, James Singertat, Kristina Kâjangmat, Signe Lyberth, Ulla-Maria Brandt, Nini Boassen, Maja Olsvig Kristiansen, Agga Táunâjik, Iluuna Kristiansen, Tage Cafurri aamma Sabina Nathanielsen.


Paasisaqarnerorusukkaanni attavissat:

Pinnguarnermi aaqqissuisut sinnerlugit

Ilinniartitsisoq ataqatigiissaarisorlu Anette Broman Mølbæk

Telefon: (+299) 25 43 45

E-mail: anettemoelbaek@hotmail.dk

Pinnguarnermi ataqatigiissaarisut videokkut oqaloqatigineqarsinnaapput arlaatigulluunniit apersorneqarsinnaallutik.