Kommuneqarfik Sermersooq, nappaatinik siusinaartumik naammattuuiniarnermi nutaamik suleriaasitaassaaq

Utoqqaap illuani najugallit napparsimasullu sullinneqarnissamik pisariaqartitsinerisa naliliiffigineqartarneranik, kommunip suleriaatsni nutarterpai.

Utoqqaat, innarluutillit tarnimikkullu nappaatillit akornini nappaatinik naammattuuiniartarnermi suleriuseq nutaaq Kommuneqarfik Sermersuumit eqqunneqarpoq. Tamatumunnga atatillugu kommuni sulisunik, innuttaasunik pineqartunik sullitaqartunik pikkorissartitsivoq. Suleriuseq danskisut triagering-mik taaneqartarpoq, taannalu innuttaasut utoqqaat illuini najugallit namminerluunnit angerlarsimaffinni najugaqartut paarisariaqartulli sullinneqarnerini kommunip atulissavaa.

Pikkorissaaneq Kommuneqarfik Sermersuup Aalborg Kommunemik suleqateqarneranik aallaaveqarpoq, peqqissaasunillu marlunnit Aalborgimeersunit ingerlanneqarluni Isumaginninnermut Ingerlatsivik suleqatigalugu. Kommuneqarfik Sermersuumi sulisut 2017-ip ukiaanerani Aalborgimiissimapput, tassanilu suleriaaseq pineqartoq, nappaatinik soorlu nakasulunnermik, pualluuteqarnermik allanillu naammaattuuiniarnermi atorneqalerumaartussaaq iserfigisimallugu.

Merry Jakobsen Ippiarsummi sulisoq qilanaarpoq, suliartornermi ineqartut qanoq innerannik sukkanerusumik takusaqarsinnaalernissamut. ”Nikerartunik vagteqarluta sulisarpugut, suliartornermilu ajornannginnerulissaaq suna eqqumaffigisariaqassaneripput.Soorlu vagtinimita siuliini susoqarsimava? Ilaatigut aggersagaalluta sulisinnaasarpugut, skemalu suleriaatsimi atorneqartoq inisimasuutitta qanoq innerannik paasinnipallassinnaanitsinnut assut iluaqutaassaaq.”

Suliassanik akisussaaffinnillu agguataarinninnermi suleriuseq ersarissunik takussitissiivoq, tamatumalu siunertaraa aalajangiinerit utoqqaat illuini najugaqartunut attuumassuteqarsinnaasut ajornannginnerusumik pisinnaalernissat. ”Suleriuseq ullumi atoriikkatsinnik imaqarpoq. Kisiat sulisut akornanni suliassat agguataarneqarnerat ersarinnerulissaaq, suliassanik tunioraasarnikkut, inisimasullu qanoq issusaasa nakkutiginera ajornannginnerulissaaq,” Ajannguaq Kristoffersen, utoqqaat illuanni Ippiarsummi sulisoq oqarpoq.

Najukkamut nalimmassarnera

Danmarkimi Sundhedsstyrelsen 2017-mi decembarimi Tidlig opsporing af forringet helbredstilstand og nedsat funktionsevne hos ældre mennesker (utoqqani peqqiilliuutinik pikkorluutinillu siusinaartumik nassaarniarneq), saqqummersippaa taannalu 2013-mi sasqqummersitamut tapitassatut suliarineqarsimalluni. Saqqummersitap innersuussutai najukkamut naleqqussarneqarsinnaasut, ilaatigut Aalborg Kommunimit atorneqarput.

Najukkami pissutsinut nalimmassaasinnaanissaq Hotel Hans Egedemi pikkorissaanermi sammineqartut ilagaat. Pikkorissaanermi peqataasoq toqqartorneqarsimapput qitiusumik sulisussatut, suleqatitik Isumaginninnermullu Ingerlatsivik peqatigalugit suleriutsip qanoq pitsaanerpaamik atorneqarsinnaaneranik nalilersuimaartussatut, suliffeqarfinni uluinnarni sulineq eqqarsaatigalugu.

Suleriutsip pineqartup iluatsinnissaanut pingaaruteqarpoq innuttaasut ikiorneqartut taakkununngalu qanigisaasut, qanimut suleqatigineqarnissaat. Siusinaarluni nappaatinik naammaatuuiniarnermi suleqatigiinnerup iluaqutigaa, qanigisaasut tassaasarmata pineqartumik nalunngisaqarnerpaat, taakkuullutillu annikitsunik allanngortoqartillugu iliuuseqarfigineqartariaqarsinnaasunik takunnipallassinnaasartut.

Innuttaasut pineqartut qanoq issusaat sulisut nalunaarsoraagamikku, siornatigutut iinnarnersoq ajorseriarsimanersorluunniit maluginiartarpaat. Ajorseriarsimanerlu tamanna iliuuseqarfigineqapallattariaqarnersoq eqqumaffigineqarallaannassanersorluunniit ilanngullugu aamma nalunaarsorlugu.