Innuttaasunut

Inge Olsvig Brandt – Juullimi eqqaamasanni nuannernerpaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.




Kommueqarfik Sermersuup juullimi ammartagaa juullernissaata tungaanut ingerlavoq. Kommunalbestyrelsimi ilaasortat apersornikuuagut ukiup ingerlanerani suliaminni suut nuannarinersaasimaneraat aamma inuunerminni juullimi eqqaamasaminni suna nuannernersaanersoq.

Kommunalbestyrelsemi suliagut arlallit suleqataaffigalugit nuannersimapput. Kisianni suliat marluk uanga nuannarinersaasimavakka. Siullertut taassuara innarluutilinnut siunnersuisoqatigiinnik pilersitsisimanerput, tamanna pingaarutilittut pisariaqartutullu isigigakku.

Innarluutillit atugarisaannik pitsanngorsaanissaq siunnersuisoqatigiit suliassarissavaat isumaqarpungalu innarluutillit pillugit immikkut siunnersoqatigiinnik peqalernerup, sullissinerup pitsaanerulerneranik kiguneqassasoq. Innarluutilinnut ilaqutaasut siunnersuisoqatigiit qanimut suleqatigisassavaat tassuunalu qularnaarlugu aamma taakku tusarneqartarnissaat.

Ilanngullugu nuannaarutigaara filmiliornermi sullivimmik pilersitsisoqarnissaanik aappaagu missingersuummi aningaasanik immikkoortitsisimagatta, tamanna kommunitsinni kulturimut nukitsorsaataasussaammat.

Juulli nuannertuaannaraluartoq, Qaanaami juullisiornerput nuannernerpaatut eqqaamasarpara. Meeraalluni assut tupinnarpoq alliartorfigisimasarinngisami juulli misigalugu.

Eqqaamavara timmisartorsuaq qulaalluni juullimi poortukkanik kingaallassaaserlugit nakkaatitsimmat. Tassani siku qaammaqqutinik ikititeriffigineqarsimagami, takullugu assut juullerpalunneq misigalugu eqqaamavara. Juullimi juulimaaq helikopterimut ilaalluni tikippoq, meeqqatullu maluginiarpara juulimaaq qernertormiuusoq. Unnulernerani innuttaasut tamarmik katersortarfimmiipput, tassanilu meeqqat tamarmik sakkutuunit naatitanik tuniorarneqarput pinngitsoqaratik.




Kommuneqarfik Sermersuup juullimi unammisitsinerani #julenuuk-mut peqataanissat eqqaamajuk. Hashtag #julenuuk atorlugu Facebookimut Instagramimulluunniit assimik ikkussiguit unammisitsinermut peqataassaatit.