Innuttaasunut

Nivi Olsen – Juullimi eqqaamasanni nuannernerpaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.


Kommueqarfik Sermersuup juullimi ammartagaa juullernissaata tungaanut ingerlavoq. Kommunalbestyrelsimi ilaasortat apersornikuuagut ukiup ingerlanerani suliaminni suut nuannarinersaasimaneraat aamma inuunerminni juullimi eqqaamasaminni suna nuannernersaanersoq.

2017-imi kommunalbestyrelsimi suliarisimasatsinni nuannarinersaara, Ipad projektimik aallartitsisimanerput. Kommuneqarfik Sermersuumi atuarfiit tamaasa, iPadinik atuartitsinermi ilinniartitsisunut iluaqutaasinnaasunik, pilersorusuppagut. Aallaqqaasiutitullu Atuarfik Hans Lynge iPadinik 20-inik tunineqarsimavoq.

Suliniutip atuarfiit sinnerinut siammarterneqannginnerani AHL-imi misillatagaqineqartut takoqqaarusuppagut. Nuannaarutigaarali 2018-imi ingerlanissaanut aningaasaliiffigineqarnissaa inississimagatsigu. Suliniutip ingerlaqqinnissaanut fondit aningaasaliisarnissaannut piareersanerit aallartereersimamamta toqqissisimanarteqaara.

2010-imi juullisiornerput uanga juullimi eqqaamasannit nuannernersaavoq. Angajullequterput 2009-imi inuuvoq nukarlerlu 2010-imi decembarip 5-iani inunngorluni, taamaalilluta meeqqagut marluk ilagalugit juullioqqaarfigalutigu. Nammineerluni meerartaaraanni soorlu juulli meeqqap isaaanik misigeqqillugu. 2010-imi juulli uanga eqqaamasanni nuannernersaavoq.

Juulliliivissoq Ilulissani illutaatsinnut angerlarpugut, marlunnik meeraqalerismalluta. Juullimut taamak qanitsigisumi meerartaarluni soorlu juullimi tunissutisilluni, aamma tassani juulli angajullequtitta siullermeerluni maluginarnerullugu atormagu assut nuannequtaavoq.


Kommuneqarfik Sermersuup juullimi unammisitsinerani #julenuuk-mut peqataanissat eqqaamajuk. Hashtag #julenuuk atorlugu Facebookimut Instagramimulluunniit assimik ikkussiguit unammisitsinermut peqataassaatit.