Innuttaasunut

Inuusuttut Kommunalbestyrelsiat Kommuneqarfik Sermersuumi pilersinneqarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Inuusuttut 13-iniit 17-nut ukiullit Kommuneqarfik Sermersuumi inuusuttut kommunalbestyrelseanut peqataanissaminnut periarfissaqalerput. Tamanna kommunalbestyrelse tamarmiullutik kingullermik ataatsimiinnerminni akuersissutigivaat.

Kommunalbestyrelsimut ilaasortap Peter Davidsenip (S) inuusuttut kommunalbestyrelsiata pilersinneqarnissaanut inuusuttut peqataatinnerisigut akisussaaqataanerisa annertusarneqarnissaat siunnersuuteqarnermini tunngavilersuutigaa.

– Nuannaarutigaara siunnersuutiga akuerineqarmat. Kommuneqarfik Sermersuumi inuusuttut tamat oqartussaaqataanerannik akisussaaqataanissaannut periarfissinneqassapput, aamma tamanna kinguneqassammat inuusuttuaqqat oqartussaaqataanermi, isummersornerni tunngavilersorluakkanik ingerlatsinissaannut ilinniarnissaat aqqutissiuunneqassammat. Pingaaruteqartutut isigaara  inuusuttut kommunalbestyrelsianni namminneq atukkaminnut tunngassunut sunneeqataasinnaanerat ammaanneqassammat.

Peter Davidsen isumaqarpoq inuusuttut takorluukkaminnik/siunnersuutiminnik saqqummiussinermikkut tunngavilersuillutik allanngueqataanissamut periarfissinneqassasut.

– Qularutiginngilaralu atuarfeqarfinni elevrådimi (atuartut sinniisaanni) suleqataaneq siunertaqarnerulissasoq, tassami elevrådimi ilaasortaasut qinersinikkut inuusuttut kommunalbestyrelsiannut qinerneqartassapput taakkulu atuarfitsik sinnerlugu sunneqataasinnaanngussapput, atukkatillu pillugit toqqaannarnerusumik kommunalbestyrelsimut anngussaqarsinnaalissallutik.

– Naatsorsuutigaaara elevrådit minnerniit annernut isumasioqatigiittarnissaat inuusuttut kommunalbestyrelsiata ataatsimiinnginnerani. Taamaaliornikkut atuarfimmi elevrådit tamarmiusut inuusuttut kommunalbestyrelsianut “piginneqataanerat” sunniuteqarnerussammat.

Peter Davidsenip pissangatigivaa inuusuttut kommunalbestyrelseata aallartinnissaa, qanimullu malinnaaffigissamaarlugit.

– Inuusuttut kommunemi politikkikkut suliaqarnermut soqutiginninnerannut sunniuteqassanersoq pissangatigaara, Peter Davidsen oqarpoq.

Inuususuttut kommunalbestyrelsiat siullermeerlutik ataatsimiissapput 2018-mi.

Illoqarfinni meeqqat atuarfiannit/friskolemit tamanit atuartut marluk kiisalu nunaqarfinni aqutsisoqarfiusuni tamani atuartut marluk qinerneqartassapput.

Inuusuttut kommunalbestyrelsiannut ilaasortat inuusuttut kommunalbestyrelsiata ataatsimiinnissaannut oqaluuserisassanik siunnersuuteqartassapput, taakkulu kingorna kommunalbestyrelsimut siunnersuutitut ingerlateqqinneqartassallutik.

Inuusuttut suliani iluarisimaarnerminnut, ilinniarnerminnut ineriartornerminnullu tunngasuni isummersorfiginissaannut periarfissinneqassapput. Kiisalu aamma oqartussaaqatigiinnerup aqqani sunniuteqarnissamut inuusuttut annerusumik periarfissaqalissallutik. Kommunimilu sulinermut soqutiginninnerulernissat aamma eqqarsaatigineqarluni.

Naatsorsuutigineqarpoq inuusuttut kommunalbestyrelsiat ukioq ataaseq allortarlugu 500.000 koruuninik akeqassasoq.