Innuttaasunut

Henrik Rachlev – Juullimi Eqqaamasanni Nuannernerpaaq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.


Kommueqarfik Sermersuup juullimi ammartagaa juullernissaata tungaanut ingerlavoq. Kommunalbestyrelsimi ilaasortat apersornikuuagut ukiup ingerlanerani suliaminni suut nuannarinersaasimaneraat aamma inuunerminni juullimi eqqaamasaminni suna nuannernersaanersoq.

Paamiuni imermik tunisassiorfiliornissamut pilersaarutit ataatsimiititaliami suleqataaffigisimanera assut nuannaraara. 2017-imi kommunalbestyrelsemi suliatsinni taanna eqqaamanerpaassavara. Nalunngikkaluarlugu suliaq qinigaaffiup siulianili aallartissimagaluartoq, suliniutitut pingaarutilittut isigisimavara, nammineq Paamiuneerama nalunagulu inuussutissarsiornissamut periarfissat nutaat illoqarfimmut qanoq pingaaruteqarsinnaatigisut.

Juullimi eqqaamasakka nuannersut amerlaqaat, taamaattumik ataasiinnarmik taasinissaq nalunarpoq. Ilaqutariit juullisiortarpugut neraqatigiittaarluta nuannersumik. Suli angerlarsimasunik pingasunik meeraqarpunga, juullimilu kissaatigisimasaannik tunillugit assut nuannertarpoq.

Juullikkunni naalagiarneq aamma assut nuannaraara. Igammik juullikkunni tussiutinik tussiaqataallunga, soorlu Guuterput, kalaallit tamarmik nuannarigunagaat.

Naggataagut juullisiorluarnissassinnik ukiumullu nutaamut iserluarnissassinnik kissaappassi.


Kommuneqarfik Sermersuup juullimi unammisitsinerani #julenuuk-mut peqataanissat eqqaamajuk. Hashtag #julenuuk atorlugu Facebookimut Instagramimulluunniit assimik ikkussiguit unammisitsinermut peqataassaatit.