Nuuk Nordisk Kulturfestival 2019-ip pilersaarusiorneqarnissaanut Kommuneqarfik Sermersooq aningaasanik immikkoortitsivoq.
2017-imi ukiagaa Nuuk Nordisk Kulturfestival aappassaa ingerlanneqarpoq. Festivali assut soqutigineqarluarsimavoq, soorlu 2015-imi aamma taamaassimasoq. Tamanna tunngavigalugu, festivalip 2019-imi ingerlanneqarnissaanut, aappaagumut missingersuummit Kommuneqarfik Sermersooq 300.000 koruuninik immikkoortitsisimavoq.
Nuuk issittormiut akornanni Kalaallillu Nunaanni eqqumiitsuliornikkut kulturikkullu illoqarfittut pingaarnertut inissisimanissaanut, Kommuneqarfik Sermersuup illoqarfiit pingaarnersaat pillugu periaasissiamini takorluugaanut, Nuuk Nordisk Kulturfestival naleqqulluartuuvoq.
Nunanit Avannarlernit tamanit eqqumiitsuliortunik takutitsinernik saqqummersitsinernillu timitaqartinneqarluni festivali ingerlanneqartarpoq, kalaallit kulturiannik allatukajaaq nittarsaassiutigaluguni.
Aaqqissuussaq uteqattaartoq
Nuuk Nordisk Kulturfestival pilersitsiortoqatigiinnermik illoqarfimmilu kulturikkut suliaqarfiusunik peqataatitsinissamik aallaaveqarpoq. Tamanna takuneqarsinnaasarsimavoq illoqarfimmi saqqummersitsinerni sulianilu pissanganartuni.
Aappaagu missingersuummit aningaasaliissutitigut Kommuneqarfik Sermersuup qularnaarusuppaa festivali siunissami uteqattaartumik ingerlalissasoq. Tamannarpiarlu tunngavigalugu 2019-imi missingersuummit 300.000 koruunit aamma immikkoortineqareersimapput.