Eqqakkanik Sullissivinni angallattakkani kommunimi sulisut eqqagassannik immikkoortiterinissamut ikiuutissapput.
Ullumikkumiit Nuummi Eqqakkanik Sullissiviit angallattakkat ingerlaassapput, najukkavillu eqqannguani taamaalillutit eqqagassannik annertuunik igitsisinnaassaatit. Eqqakkannik Sullissivinni eqqagassatit annertuut immikkoortitikkat tunniussinnaavatit. Tamatumunngalu pissutissaqarluarpoq.
Taama oqarpoq Sanarfinermut Avatangiisinullu Ataatsimiititami siulittaasoq Malene Lynge (IA):
”Kommunalbestyrelsimit Kommuneqarfik Sermersuup mingutsitsisuunnginnissaa sulissutigineqarpoq. Taamaattumik kommunimi Eqqakkanut Sullissivik assigiinngitsunik suliniuteqarpoq. Suliniutit ilagaat Eqqakkanut Sullissiviit angallattakkat, taakkulu pingajussaanik Nuummi ingerlaartinneqarput. Kommune mingutsitsisuunngitsoq anguniarlugu eqqakkanik immikkoortitsineq pingaaruteqarpoq – matumani ingerlanneqartumi aammali nalinginnaasumik ingerlatsinermi. Eqqagassat eqqortumik immikkoortiternerisigut sapinngisamik amerlanerpaat atoqqinneqarnissaat, pinngortitallu mingutsinneqannginnissaa, qulakkeertarparput.”
Eqqakkannik Sullissivinni angallattakkani ilaatigut eqqagassatit igalaamerngit, eqqagassat navianarsinnaasut savimerngillu immikkoortissavatit. Eqqakkat navianarsinnaasut savimerngillu Danmarkimut atoqqitassatut nassiunneqassapput. Igalaamerngit akuitsut illoqarfimmi atoqqinneqarsinnaapput – soorlu aqquserngiornermi. Taamaalilluni kommunalbestyrelsimit Kommuneqarfik Sermersuup mingutsitsisuunnginnissaannut anguniagaq Eqqakkanik Sullivinnik angallattakkanik peqarnikkut malinneqarpoq.
Qaqugu Eqqakkanik Sullissiviit eqqassinniissanersoq takuuk
Eqqagassanik annertuunik tunniussinissamut malittarisassat takukkit
Paasissutissat
- Eqqakkanik Sullissiviit angallattakkat Nuummi ingerlaartinneqassapput piffissami 16. oktobarimiit 29. oktobarip tungaanut. Eqqakkanik Sullissiviit ammasarput sulisoqarlutillu nal. 15-20.
- INI-mi Iserit-imiluunniit inimik attartortuuguit, eqqakkanillu annertuunik igitsiniarlutit taava inissiaatileqatigiiffiup viceværtia attavigissavat.
- Siornatigut eqqakkat annertuut aqquserngup eqqaanut iliorarneqartartut Eqqakkanik sullissivinnik angallattakkanik taarserneqarput.
- Eqqakkanut Sullissivinnut angallattakkanut eqqagassatit navianarsinnaasut tunniukkukkit, Ikuallaavimmi eqqakkanut navianarsinnaasunut tigooraavimmukaanneqartarput.k Tassani kommunimi sulisunit ilinniarsimasunit, eqqakkanik passussinissamut akuerisaasunit, pinngortitamut inissinnagit, immikkoortiterneqarnissaat, poortorneqarnissaat kiisalu nunanut allanut nassiunneqarnissaat isumagineqartarput.
Tamaat ataatsimut isigalugu – eqqakkat atoqqitassat:
- Savimerngit
2015-imiilli savimerngit eqqakkat atoqqitassatut Nuummiit nassiunneqartalerput. Siornatigut saviminernut eqqaavissuarmi toqqorneqartarput issumillu matoorneqartarlutik. Savimerngit eqqakkat amerliartuinnartut atoqqitassatut nassiunneqartarput.
2015: 51 tonsit
2016: 265 tonsit
2017: 289 tonsit (aggustip 22-anni)
- Pappit
Pappit siornatigut Ikuallaavimmi ikuallanneqartarput. Kommuneqarfik Sermersuup 2016-imiit pappit atoqqitassatut nassiuttalerpai.
2016: 81 tonsit
2017: 64 tons (aggustip 22-anni)
- Biilit
Kommuneqarfik Sermersooq ukioq manna siullermeerluni biilit savimerngit atoqqitassat nassiutissavai. Siornatigut biilit saviminernut eqqaavissuarmut nakkutigineqanngitsumik iginneqartarput. Biilit maannakkut avatangiisinut mingutsitsinnginnissaannut suliarineqaqqaartarput, biilikuniillu savimerngit igalaamerngillu atoqqitassatut nassiunneqartarput.
2017: 29 tons (aggustip 22-anni)