Ataasinngorneq 16. oktobari Nunat Avannarliit Nuummi kulturisioqatigiinnerat 2017 assigiingitsorpassuarnik nuannisarfiusunik takutitsinertalik aallarnerneqarpoq, ammaanersiorneqarlunilu filmfestivalimi oqalugiartoqarpoq, ilaatigullu Rasmus Lyberth aamma Steffen Brandt tusarnaartitsillutik.
”Nunat Avannarliit Nuummi aatsaat aappassaanik ingerlanneqarpoq,” taama oqarpoq borgmester Asii Chemnitz Narup ammaanersiornermi oqalugiarnermini. ”2017-imili pisussatut aaqqissorneqarsimasut eqqarsaatigalugit oqartariaqarpunga, festivali una tamatsinnut tunissutaasoq nuannerluinnartoq, taamaammat ukioq manna kulturikkut tunissutissarpassuit pisussat qilanaariinnarsinnaavasi, misigisassarpassuuppummi isiginnaartitsinermut, tusarnaartitsinermut, qitinnermut, operamut, assilissanik eqqumiitsuliornermut, atuakkialerinermut allarpassuarnullu tunngapput – ataatsimut katillugit kulturisioqatigiinnermi pisussat 250-it sinneqarput. Nunat Avannarliit Nuummi nunani avannarlerneersugut ataatsimoorfigaarput – uummaarissumik katersuuffik, ukiut, sumiuussuseq tunuliaquttallu apeqqutaatinnagit kulturikkut avitseqatigiiffiusinnaasoq.”
Nunat Avannarliit Nuummi kulturisioqatigiinnerat 2017.
Kulturikkut misigisassat amerlasuut ingerlanneqassapput, ilaatigut isiginnaartitsinerit, tusarnaartitsinerit, qitillutik takutitsisut, operamik tusarnaartitsineq, eqqumiitsulianik saqqummersitsinerit, atuagassialerinertallit allarpassuillu – ataatsimut katillugit kulturikkut aaqqissuusat 250-it sinnerlugit.
Sapaatip-akunnerata ingerlanerani kulturikkut pikialaartitsinerit ingerlanneqassapput, ilaatigut isiginnaariartoqarsinnaavoq, aliikkusiartoqarluni, saqqummersitsisoqassaaq atuffassisoqassallunilu Nuummi sumiiffinni assigiinngitsuni 50-init sinneqartuni. Ilaatigut Nunatta Isiginnaartitsiviani ingerlanneqassapput, Nunatta Atuagaateqarfiani, sumiiffinnilu assigiinngitsuni tamanit orninneqarsinnaasuni, Inussivimmi, Katuami sumiiffiillu assigiinngitsorpassuit illoqarfiup iluani siaruaqqasut.
Isiginnaartitsinerit, tusarnaartitsinerit, saqqummersitsinerit atuffassinerillu saniatigut workshoppertitsinerit, isumasioqatigiinnerit tamanullu isumasioqatigiisitsinerit pilersaarusiorneqarsimasut ingerlanneqassapput.
Pisussat
Pisussat tamakkerlugit uani takukkit>> http://nuuknordisk.gl/kl/pisussat/#/artists/alphabetical
App-eq ’Nuuk Nordisk Festival’ aamma aasinnaavat. Pisussat tamakkiisut uani takusinnaavatit mobilillu atorlugu sapaatip akunneranut ajornanngitsumik pilersaarusiorsinnaallutit.
Uani nittartakkami tamanit alakkarneqarsinnaasumi billetimik pisisoqarsinnaavoq: http://nuuknordisk.gl/kl/ilaanniarit/
Aaqqissuusisut
Nunat Avannarliit Nuummi kulturisioqatigiinnerat 2017 Nunani Avannarlerni Piorsarsimassutsikkut Attaveqaat, NAPA Kommuneqarfik Sermersuullu suleqatigiinneranik ingerlanneqarpoq.