Martha Lund Olsen (S) ullumikkumiit Kommuneqarfik Sermersuumi Kommunalbestyrelsimiit sulinngiffeqassaaq.
Isumaginninnermut Naalakkersuisuusimasoq Martha Lund Olsen 1. december aallarnerfigalugu Kommuneqarfik Sermersuumi Meeqqanut Ilaqutariinnullu Ingerlatsivimmi pisortanngussaaq. Taamaattumik 3. oktober aallarnerfigalugu kommunalbestyrelsimiit sulinngiffeqarnissaminik qinnuteqarsimavoq.
Jens Kristian Berthelsen Martha Lund Olsenimut paarlattaassaaq. Siumut sinniisuisa allattorsimaffianni sinniisuni siullersaavoq.
Martha Lund Olsen una tunngavigalugu kommunalbestyrelsimiit ilaasortaajunnaarpoq:
”Matumuuna 3. oktober aallarnerfigalugu kommunalbestyrelsimit sulinngiffeqarnissannut qinnuteqarpunga, atorfimmut atorfigilikkannut atatillugu kommunalbestyrelsimi sulininnut suliamut attuumassuteqarpallaartutut isigineqarsinnaanera peqqutigalugu.”
Martha Lund Olsenip ataatsimiititaliani siulersuisunilu ilaasortaaffii qanoq inuttalersorneqassanersut Siumumiit aalajangerneqassaaq.
Martha Lund Olsenip ilaasortaaffii:
Politikkikkut ataatsimiititat:
Aningaasarsiornikkut Inuussutissarsiornermullu Ataatsimiititami ilaasortaq
Meeqqanut Ilaqutariinnullu Ataatsimiititami Ane Egede Mathæussenimut sinniisoq
Siulersuisuni ilaasortaaffiit (Kommuneqarfik Sermersooq sinnerlugu):
Kulturimik siuarsaaneq pillugu Siunnersuisoqatigiit (Sermeq Tapiissuteqarfik)