Nunani avannarlerni takornariaqarneq pillugu saqqummersitsinersuarmut, Vest Norden Travel Martimut, ulluni makkunani Nuummi ingerlanneqartumut atatillugu, nersornaat ‘Vest Norden Travel Award’ tunniunneqarpoq, ukioq mannalu Kalaallit Nunaanni Colourful Nuummut tunniunneqarpoq.
Tunniunneqarnerani ilaatigut pingaartinneqarpoq, Colourful Nuup tunngaveqarnerani nutaaliorneq suleqatiginnilluarnerlu – soorluttaaq takornariaqarnikkut siuarsaasut pikkorissaanerit, isumasioqatigiinnerit suliniutillu taaneqartut.
”Nuannaarutigeqaara ukioq manna Nuummi takornariaqarnikkut siuarsaanermik ataatsimut suliniuterput ajugaammat,” oqarpoq borgmesteri Asii Chemnitz Narup. “Colourful Nuuk piffissami sivikitsumi Nuuk takornariarfissuartut tikinneqartalerneranik annertuumik iluatsilluartumillu siunnerfilittut suliniutaaqataavoq. Colourful Nuuk pilersinneqaqqaarneraniilli qanimut malinnaaffigaara, aamma Sermersooq Business Councilimit Ulla Lynge pingaarnertut ingerlatsisoralugu siunnerfeqaqqissaartumik suliniuteqarnerani malinnaaffigalugu – Visit Greenland qanimut suleqatigalugu. Ilumoortoq tassaavoq, akiuunneq iluaqutaasarpoq. Tamatta pilluarta aamma Colourful Nuuk pillugu ulapissimasunut tamanut qujanarujussuaq.”
Nersornaat Travel Trade Outbound Scandinaviamit tusagassiortunit angalasunit tunniunneqassaaq.
Colourful Nuuk toqqarneqarnerani tunngavilersuutit imaapput:
- Colourful Nuuk – ilisarnaataallualersullu tunngaviliisui Sermersooq Business Council aamma Kommuneqarfik Sermersooq – ukiuni kingullerni ilaatigut Visit Greenland suleqatigalugit najukkami takornarialerisut takornariaqarneq pillugu ulloq naallugu pikkorissartitsisarnikkut arlalitsigut siunnerfeqarluartumik ilinniartittarsimavai.
- Colourful Nuuk upernaaq manna najukkami takornarialerisut 18-it Vestnorden Travel Martimi isumassarsianik nutaanik nutaalianillu ilusilersuisussat isumasioqatigiisippai.
- Ukiuni tulliuttuni illoqarfiit pingaarnersaannut eqqaanullu takornariaqarneq pillugu periusissiamik suliaqarnermut atatillugu Colourful Nuuk suleqataalluarpoq.
Colourful Nuuk pillugu paasissutissat allat atuakkit uani: http://colourfulnuuk.com/