Nuuk maajip qeqqani Nunani avannarlerni killerniit (VNHF) aallartitanut katersuuffiuvoq. Tassani aalajangerneqarpoq aningaasaliissutit pingasuusunit marluk Nuummeersunut tunniunneqassasut. Katersuunneq aamma misilittakkanik avitseqatigiiffiuvoq. Misilittakkat taakku siunissami Reykjavikip, Tórshavnip Nuullu akornanni ataqatigiinneq aamma nukittorsassavaat.
Nunani avannarlerni killerni illoqarfiit pingaarnersaasa aningaasaateqarfiata suliassaasa pingaarnersaraat kommunet taakku pingasut innuttaasuisalu akornanni kulturikkut, ilinniartitaanikkut timersornikkullu suleqatigiinneq paaseqatigiinnerlu annertusarnissaanut tapiinnissaq. Tassa imaappoq: Inuit ataasiakkaat, peqatigiiffiit allallu taakkununnga attuumassuteqartunik suliaqartut aningaasatigut tapiiffigineqarnissaminnut qinnuteqarsinnaasut, tassanilu siunertaalluni kommunet taakku akornanni ataqatigiinneq nukittorsarneqassasoq. Aallartitat siulersuisut ataatsimiinneranni aningaasaliissutit kikkunnut agguaanneqassanersut eqqartorneqarpoq.
Qinnuteqarsimasut pingasut akornanni marluk Nuummeersut tunineqarput, tassaasut: Nuummi naluttarfik (120.000,00 kr) taavalu Nuuk Shotokan Karate-Do (60.000,00 kr). Tassani aamma aalajangerneqarpoq ukiup siuliani sinneqartoorutit atorlugit ukiut tulliinut 2024-mi 2025-milu aningaasaliissutit qaffanneqassasut, taamaalillutik illoqarfiit tamarmik 200.000,00 koruuniniit 300.000,00 koruuninut tapiissutigineqarumaarlutik.
Tikeraartitsineq ullunut marlunnut pilersaarutaammat tikeraartut misigisassarsiornissaminnik periarfissaqarluarput illoqarfiullu sanaartorfiulluarnera malugilluarlugu. Piffik tamanna misilittakkanut pitsaasunut avitseqatigiinnissamut tulluarluinnarpoq. VNHF-miit tikeraartut illoqarfimmut takornariartinneqarput, tassanilu kommunep aaqqissuussaanikkut aqutsisoqarfiani pisortap Runa Sværdip ingerlappaa.
“Siullertut nuannaarutigalugu eqqaarusuppara Reykjavikkimiit Tórshavnimiillu suleqatitsinnut Nuuk takutissinnaagakku. Qularnanngilluinnarpoq misilittakkanik avitseqatigiinneq taakkununnga kommunenut pingasunut pingaaruteqarluinnartuusoq. Sermersooq kommunetut annertuallaanngikkaluarluni ineriartortuusup qularnanngilaq kommunet taakku suleqatigisatta illoqarfittut ineriartornikkut misilittagaat pissarsiaqarfigissagaa. Uaguttaaq misilittakkat ilisimasagut taakkununnga iluaqutaasinnaasut tunniuppagut.” Taama oqarpoq Kommuneqarfik Sermersuummi borgmesteri Avaaraq S. Olsen.
Siulersuisut ataatsimiinnerat takornariarnerullu saniatigut aamma periarfissaavoq nunat taakku kulturii paasisaqarfigissallugit kulturikkullu paarlaasseqatigiinneq, soorluttaaq tamanna VNHF-ip siuarsarusukkaa. Tassani pilersaarutip ilaatigut imarai kulturikkut tunngasunik saqqummiineq, soorluttaaq Kommuneqarfik Sermersuumi sulisut marluk, Savalimmiunit Islandimiillu kingoqqisut, kulturikkut tunngasunik saqqummiisut.