Specialklasse/meeqqanut ADHD/ADD autismeqartunullu perorsaanikkut iliuuserineqartut

Nunatsinni meerartatta nalerisimanissaat naatsorsuutigiumallugu, minnerunngitsumik kommunitsinni atuarfinni pitsaanerpaamik atugassaqartinnissaat politikkikkut atituumik isumaqatigiissutigineqarpoq. Tusartarparpulli perorsaanermi immikkut neqeroorutini akissaasersuinissaq ajornartorujussuusinnaasoq, ilinniartitsisut ilinniarsimasut perorsaasullu ilinniarsimasut ikippallaarnerat pissutigalugu.

Apeqqut: ASK-imi klasse ataaseq qanoq ingerlava, aamma nalinginnaasumik Kommuneqarfik Sermersuumi qanoq ingerlasoqarpa (ADHD, ADD aamma autismeqartut qassiuppat), ilanngullugu ikorfartortit qassit aningaasaliiffigineqarpat kiisalu iliuusissatut pilersaarutit immikkut ittut aallartinneqareerpat imaluunniit aallartinneqartussatut pilersaarutaappat?

Meeqqanut Atuarfeqarnermullu Ingerlatsivik ima akivoq:
Asasara Poul Petersen

Siullermik Specialklasse/meeqqanut ADHD/ADD autismeqartunullu perorsaanikkut iliuuserineqartut pillugu apeqqutinnut qujanaq.

Atuarfinni suliaq ingerlanneqarpoq Meeqqat atuarfianni immikkut atuartitsisarneq aamma allamik immikkut ittumik perorsaanikkut ikiorsiisarneq pillugit Namminersorlutik Oqartussat nalunaarutaat nr. 21, 8. december 2017-imeersoq tunngavigalugu.

ASK-imi specialklassit arfiniliupput, taakkunani ataaseq autismeklassiulluni. Taamaattumik ingerlatsiviup naluaa klasse sorleq apeqqutigineqarnersoq. Specialklassinut ataasiakkaanut aamma atuartunut nappaataannik suussusersinikunut takussutissaqanngilaq. Aamma oqaatigineqassaaq, meeqqat nappaataannik suussusersinikut kisimik specialklassiniittanngimmata, kisianni aamma meeqqat immikkut pisariaqartitsisut. Tassa meeqqat nappaataannik sussuusersinikut kisimik specialklassini atuartinneqartanngillat.

Atuarfeqarnermut immikkoortortami meeqqanut ikorfartortilinnut tamakkiisumik kisitsitaateqanngilagut, atuarfeqarnermut immikkoortortaqarfimmit kiisalu Meeqqanut Atuarfeqarnermullu Ingerlatsivimmit taakkununnga ikorfartorteqarneq aningaasaliiffigineqartarmat. Atuarfeqarnermut immikkoortortaqarfik ullumikkut meeqqanut 45-nut atuarnerup nalaani ikorfartorteqarnerannut aningaasaliissuteqartarpoq (20 tiimit miss.).

Taamaattoq ikorfartortillit tamarmik ikorfartorneqarnissamik pisariaqartitsinngillat, ikorfartortinik amigaateqartoqarmat. Aamma atuartut/klassit tamarmik ikorfartortinik pisariaqartitsinngillat, specialklassini nalinginnaasumik klassimi ilinniartitsisut marluusarmata.

Ullumikkut ikorfartortit meeqqanut ataasiakkaanut attuumassuteqarput. Atuarfeqarnermut immikkoortortaq taamaattoq aallartippoq qanoq ikorfartuisartoqatigiinnik pilersitsisoqarsinnaassanersoq Meeqqanut Ilaqutariinnullu Ingerlatsivimmi aamma Suliffeqarnermut Isumaginninnermullu Ingerlatsivimmi ikorfartortinik ataqatigiissaarisoq peqatigalugu. Taava assersuutigalugu klassimi tallimanik atuartulimmi tallimanik ikorfartorteqarnissaq pinngitsoortinneqarsinnaavoq, ikorfartorti ataaseq marlulluunniit pisariaqartinneqarlutik.

Atuarfeqarnermut immikkoortortaqarfik aamma immikkut atuartitsinermut aamma kommunimi immikkut ittumik perorsaanikkut ikiorsiinerit pillugit periusissiamik aallartitsivoq, ilaatigut immikkut atuartitsinermut tunngasunik qulaajaanermik imaqartumik. Tassani ilaatigut atuartunut autismeqartunut immikkut atuartitsinerup immikkoortuanik pilersitsinissaq pillugu siunnersuut sulissutigineqarpoq. Tassunga ilanngullugu ilisimatitsissutigineqarpoq, ukioq atuarfiusumut 2014/25-mut illoqarfiup qeqqani atuarfiup nutaap ammarneranut atatillugu specialklassinut immikkoortortamik nutaamik peqalissammat.

Inussiarnersumik inuulluaqqusilluta
Lone Nukaaraq Møller
Meeqqanut Atuarfeqarnermullu Ingerlatsivimmi pisortaq