Illut nutarsartariaqartut imermullu aqqusiorneqarnissamut qinnuteqarumasunut

Asasara Kommunalbestyrelsimut ilaasortaq, Laura Táunâjik Uitsatikitseq (S)
Siullermik apeqqutigisannut qujanarujussuaq.
Ulloq 30 aggusti 2022 ”Illut nutarsartariaqartut imermullu aqqusiorneqarnissamut qinnuteqarumasunut” pillugu apeqqut nassiuppat.

Apeqqutit imaattoq Suliffeqarfimmut Kiffartuussivimmit tiguneqarpoq:
“Sumiiffinni assigiinngitsuni illut ilaatigut nutarsarneqarnissamik annerusumik minnerusumilluunniit pisariaqartitsisut ukiut ingerlaneranni takussaajartuinnarput. Illullu pioreersut nutarternissaanut Kommuneqarfipput qanoq tapertaasinnaanersoq paasissallugu soqutiginartorujussuuvoq. Illut aserfallatsaaliornissaat soqutigissallugu pingaaruteqartorujussuuvoq, taamaattumik illut nutarsaanissamik imermulluunniit atassuserneqarnissamik pisariaqartitsisut qinnuteqarfigisinnaasaannik Kommunerput kontomik peqarnersoq paasissallugu pingaartuuvoq. Uani aamma pineqarput illut nammineq pigineqalersimasut, taamatullu illut nammineq sanaat imermut atassuteqalernissaannut pineqarput.
Tamakku pillugit uku apeqqutigerusuppakka:

• Illut namminneq pigilersimasat aserfallassimasut, soorlu igalaat matulluunniit taarsertariaqartut, allatigulluunniit taarsertarialinnik peqartut Kommuneqarfik Sermersuumut qinnuteqarsinnaappat?
• Apeqqut qulaani pineqartumi ilanngullugu apeqqutigerusunnarpoq illut imermut attavilertikkumasunut qinnuteqartoqarsinnaanera periarfissaava?
• Taamaassimassappat qinnuteqarfissaq sumut aaneqarsinnaava?
• Nittartagaqanngitsunut Kommunemi najugarisami piusumi aaneqaannarsinnaava?
• Qinnuteqarumasunut periarfissat qanoq nittarsaanneqarsinnaat Kommunetta soqutigitigivaa?
• Aningaasanik imaluunniit Kontomik qinnuteqarfissamik peqarsimappat, aningaasat qanoq annertutigisut qinnuteqarnermi killiliunneqarpat?”

Suliffeqarfimmut Kiffartuussivik ima akissuteqarpoq:

Asasara Laura Táunâjik Uitsatikitseq

Illut nutarsartariaqartut imermullu aqqusiorneqarnissamut qinnuteqarumasut pillugit apeqqutinnut qujanaq.

“Illuliortiternernut aningaasalersuineq pillugu Inatsisartut inatsisaat nr. 39, 23. november 2017-imeersoq aammalu Inissianik aningaasalersuisarneq pillugu Inatsisartut inatsisaata allanngortinneqarnera pillugu Inatsisartut inatsisaat nr. 36, 28. november 2019-imeersoq (Inissialiortiternermut tapiissutitalimmik illulianik iluarsaassinermut, pitsanngorsaanermut alliliinermullu taarsigassarsititsisarneq tapiissuteqartarnerlu)” naapertorlugit, kommune (BSU-p illuutaanik) iluarsaassinermut, pitsanngorsaanermut alliliinermullu tapiissuteqarsinnaavoq.

Illumik typemik allamik nutarterisoqassatillugu, nutarterinissamut taarsigassarsiniarnissamut periarfissamut imaluunniit pensionisialittut taarsigassarsiniarnissamut innersuussisoqarsinnaavoq, taakkununnga piumasaqaatit naammassineqarsinnaasimatillugit. Erseqqissaatigineqassaaq, imermik pilersuinissamut tunngasumik immikkut taarsigassarsiniarnissamut peqanngimmat, kisiannili taarsigassarsiniariaatsit marluk siuliani taaneqartut siunertamut tassunga atorneqarsinnaapput, “iluarsaassineq, pitsanngorsaaneq imaluunniit allilerineq”.

Innuttaasutut taarsigassarsiniarnissamut neriorsuuteqarfigineqarnissamik qinnuteqaateqarnissamik kissaaateqaraanni, qinnuteqarnissamut immersugassaqanngilaq, akerlianilli inatsit naapertorlugu piumasaqaatit arlaqarput. Taakkua tassaapput:
1) Iluarsartuussinissamut, pitsanngorsaanissamut allilerinissamullu kissaatigineqartumut nassuiaat.
2) Illu pillugu nassuiaat, tassunga ilanngullugit pisoqaassusaa, angisussaa, qanorlu pitsaassuseqarnesoq.
3) Suliassami aningaasartuutinut tamarmiusunut missingersuusiaq.
4) Kommunimiit nunaminertamik atuinissamut akuersissut imaluunniit nunaminertamik atuinissamut inniminniineq, suliassat pineqartut suliarinissaannut nunaminertamik atuinissamut akuersissuteqarneq pisariaqassappat
5) Nammineq aningaasalersuisinnaanerup uppernarsarneqarnera
6) Qinnuteqartup inuup normua, najugaqarnermullu uppernarsaataa
7) Illumik piginnittuunermut uppernarsaat.
8) Illit qinnuteqartutut pisortanut akiitsoqannginnerit, akilerneqanngitsut pillugit Akiliisitsiniartarnermut oqartussat uppernarsaataat.

Qulaani taaneqartut qinnuteqaammut ilanngunneqassapput, mailikkut imaluunniit allakkatigut nassiunneqarsinnaasumut.

Ilanngullugu eqqumaffigineqassaaq, nutarterinissamut taarsigassarsinissaq anguniaraanni piumasaqaatit makkua naammassineqassammata:
Inissiaq inissiamik piginnittumut, taassuma aappaanut imaluunniit meeqqanut inersimanngitsunut inissiatut atorneqassasoq.
Inissiaq qinnuteqarnerup nalaani ukiut 20-t sinnerlugit pisoqaassuseqarpat
Inissiaq ikuallattoornissamut aamma illup ajoqusersinnaaneranut sillimmaserneqarsimanissaa aamma sillimmasiinermi akiliutissani kinguaattoortoqarsimannginnissaa
Iluarsaassinernut pitsanngorsaanernullu inuulluarniutaassanngitsut, assersuutigalugu spabad

Soraarnerussutisilialittut taarsigassarsiniaraannni piumasaqaatit makkua naammassineqassapput:
Iluarsartuussisitsinissamut aningaasalersuinissamut nalinginnaasumik piumasaqaataasuni, aningaaserivimmit imaluunniit realkreditinstitutsimit taarsigassarsitinneqarnissamik itigartitaasimanissaq.
Inissiaq ikuallattoornissamut aamma illup ajoqusersinnaaneranut sillimmaserneqarsimanissaa aamma sillimmasiinermi akiliutissani kinguaattoortoqarsimannginnissaa
Illit katissimasatut aapparisat piginnittuuppat taassuma uiusup/nuliaasup iluarsaassinissaq aammalu taarsigassarsiniarnissamut qinnuteqaat akuerissammagu.

Illuliortiternernut aningaasalersuineq pillugu Inatsisartut inatsisaat nr. 39, 23. november 2017-imeersoq Illunik pioreersunik soraarnermusialinnut pigineqartunik iluarsaassinerit, § 19.
Soraarnermusialimmit inissiatut atorneqartunut aamma soraarnermusiaqartoq taassumalu aappariunnagaa marluullutik inissiamik kisimiillutik pigineqartumut inissiamik pioreersumik iluarsaassinermut kommunalbestyrelsi 300.000 kr.-it tikillugit taarsigassarsisitsisinnaavoq.
BSU-p illuutaanut tappiffigineqarnissaq pineqarpat, Inatsisartut inatsisaat nr. 36, 28. november 2019-imeersoq (Inissialiortiternermut tapiissutitalimmik illulianik iluarsaassinermut, pitsanngorsaanermut alliliinermullu taarsigassarsititsisarneq tapiissuteqartarnerlu), ”Kapitali 4 a atuutissaaq, illulianik iluarsaassinermut, pitsanngorsaanermut alliliinermullu taarsigassarsititsisarneq tapiissuteqartarnerlu:
§ 24 a. Inissianut, inunnit ukiuni akileraarfiusuni kingullerni marlunni inunnit ukiumut 300.000 koruunit inorlugit isertitaqarsimasunit pigineqartunut, imaluunniit inunnit, ulloq manna tikillugu isertitarisimasaat apeqqutaatinnagit siunissami qanittumi inoqutigiinni ukiumut 300.000 koruunit inorlugit isertitaqartussatut naatsorsuutigineqartunit pigineqartunut annerpaamik 150.000 koruuninik inissiamik iluarsaassinermut, pitsanngorsaanermut imaluunniit alliliinermut kommunalbestyrelsi tapiissuteqarsinnaavoq.
Imm. 2. Taamaallaat inissiamut Namminersorlutik Oqartussanit taarsigassarsisoqarsimappat, imaluunniit maanna piginnittuusut taarsigassarsisuullutik Namminersorlutik Oqartussanit taarsigassarsisoqarsimappat kommunalbestyrelsi tapiissuteqarsinnaavoq.
Imm. 3. Meeqqanut suli angerlarsimaffimmi najugaqartunut, 18-it inorlugit ukioqartunut, najukkami inuit nalunaarsorsimaffianni nalunaarsorsimasunut, taamaattorli amerlanerpaamik meeqqanut arfinilinnut, isertitassanut killigititat meeqqamut ataatsimut 4.000 koruuninik qaffanneqartassapput.
Taarsigassarsiniariaatsit assigiinngitsut pillugit paasissutissat, piumasaqaatit, qinnuteqarnermi piumasarisat, allallu tamarmik immikkut Sullissivik-mik allaaserineqarnikuupput. Aamma illit nammineq kommunerisavit allaaffiata immikkoortortaanut saaffiginnissinnaavutit taarsigassarsiniarnissammut paasissutissanik pissarsiniarlutit, qinnuteqarnissannullu ikiorneqarsinnaanerit pillugu.

Inussiarnersumik inuulluaqqusillunga

Ole Jakobsen

Kommunaldirektøri
Kommuneqarfik Sermersooq