Kuummiit aamma Tasiilaq pillugit apeqquteqaatit

Asasara Kommunalbestyrelsimut ilaasortaq Harald Bianco, (IA).

Siullermik apeqqutigisannut qujanarujussuaq.

Ulloq 6. septembari 2022 “Kuummiit aamma Tasiilaq pillugit apeqquteqaatit” allaffeqarfimmut nassiuppatit..

Apeqqutit imaattut Suliffeqarfimmut Kiffartuussivimmit tiguneqarput:

• “Kuummiini ivigaasaaqqanik arsaattarfissap suliarinera sumut killippa?
• Tasiilami eqqaanilu ikaat saarullinnik manisivissat suliarineri sumut killippa?
• Tasiilami ”Kalaaliaqqap” suliarinera sumut killippa?
• Tasiilami umiatsianut tinigutsitsivissap suliarinera sumut killippa?
• Tasiilami Attertumi puttasut ikkunnissaasa suliarinera sumut killippa?
• Apeqqutigissavaralu taakkununnga aningaasaliissutit nikisinneqanngillat?
  Suliat atortussaqareerlutillu aningaasalersorneqarnikooreermata apeqqutigaakka.”

Sanarfinermut Avatangiisinullu Ingerlatsivik ima akissuteqarpoq:

Asasarput Harald Bianco

Ingerlatsiviup Kuummiit aamma Tasiilaq pillugit apeqqutitit qujassutigai.

• Kuummiini ivigaasaaqqanik arsaattarfissap suliarinera sumut killippa?
  Ikkussuisartut Hollandimeersut Kalaallit Nunaanni nunanilu allani ivigaasaaqqanik arsaattarfinnik suliaqarlutik ulapissimapput.
  Suliaminnik kinguaattoornerisa, timmisartumik billetissaqannginnerisa kiisalu ukiup taamaalinerani kingusippallaarnerata kingunerisaannik ukoq manna naammaginartumik naammassinissaannut suliarineqarsinnaasimanngilaq.

Tamanna pillugu suliassaq kinguartinneqarpoq, 2023-milu juulimi/aggustimi suliarineqarnissaa pilersaarutaavoq.

• Tasiilami eqqaanilu ikaat saarullinnik manisivissat suliarineri sumut killippa?
  Manisivissanut atortussanik ingerlatsivik pisiaqarsimanngilaq.
  Ingerlatsivinnit allanit aamma/imaluunniit Najukkami Ataatsimiititaliamit inniminniisoqarsimanersoq/pisisoqarsimanersoq paasiniarneqarpoq.
• Tasiilami ”Kalaaliaqqap” suliarinera sumut killippa?
  Toqqavia aamma imermut kuuffissuarmullu atassuserneri 2021-mi suliarineqarput.
  Imermut kuuffissuarmullu atassutit atorsinnaanersut misissorneqalerput.

Atortussat pissarsiarereerput illullu napparnera sapaatip-akunnerini 37/38-mi aallartinneqassaaq.

• Tasiilami umiatsianut tinigutsitsivissap suliarinera sumut killippa?
  Tasiilami umiarsualiviup itinerulersinneqarneranit atortussat umiatsianut tinigutsitsivissamut atoqqinneqarnissai pilersaarutaavoq.
  Immamit atortussat atoqqinneqarnissaannut Namminersorlutik Oqartussanut attaveqartoqarpoq, tassa pingaartumik Imaani avatangiisit illersorneqarnissaat pillugu inatsit, ilanngussaq 3 unamminartorsiortitsimmat.
  Suli Namminersorlutik Oqartussanik oqaloqatiginninnerit ingerlanneqarput, umiarsualiviullu iluatungaani misissugassanik tigusisoqarpoq. Misissukkat pillugit akissutissat utaqqineqarput.

Pilersaarutip 2023-mi suliarineqarnissaa naatsorsuutigineqarpoq.

• Tasiilami Attertumi puttasut ikkunnissaasa suliarinera sumut killippa?
  Puttasut inissisimaffissaa misissorneqarpoq.
  Puttasunut ikkussiviusinnaasumik annikitsumik nunniortoqassanersoq eqqarsaatigineqarpoq.
  Nunniornissaq qanoq annertutigissanersoq naatsorsorneqarpoq.
• Apeqqutigissavaralu taakkununnga aningaasaliissutit nikisinneqanngillat?
  2022-mut aningaasat immikkoortinneqarsimasut suli 2023-miipput, tassa pilersaarutit piviusunngortinneqassapput, piffissalli nikisinneqarlutik.

Inussiarnersumik inuulluaqqusillunga

Hans Ulrik Skifte
Sanarfinermut Avatangiisinullu Ingerlatsivimmi Pisortaq