Sapaatit akunnerini kingullerni ineqarneq pillugu suliaq nutaarsiassani sammineqallattaarpoq. Suliamili pineqartut arlallalik kommunalbestyrelsimut saqqummiunneqareernikuupput, misissuinermilu isornartorsiutigineqartut qaammatini arlaqartuni ataavartumik aaqqivigineqarnissaannut alloriartoqartareernikuulluni.
”Ingerlatsineq pillugu misissuisoqarnerani paasisaqaqqinnerput iluarpoq. Ilutigalugu nuannaarutigaara ingerlatsinermi sulilluarnikkut isornartorsiutaasimasut arlaqartut aaqqiivigineqareersimammata”, borgmester Charlotte Ludvigsen oqarpoq nangillunilu;
”Nalunaarusiami pissutsit taaneqartut arlallik allaffissornermiit qulaajarneqarput. Taakku ataavartumik suliamut tamakkiisumik isiginnilersitsisut, kommunalbestyrelsimut ingerlatitseqqiinissannut periarfissiisimapput. Nuannaarutigaara allaffisornermi sulisut nammineerlutik ajornartorsiutaasut aaqqiivigisinnaasimammassuk kiisalu pissutsit ataavartumik saqqummiunneqarsinnaasarsimammata.”
Ilutigalugu Charlotte Ludvigsenip ersarissarpaa, suliami pineqartup nalaani atorfeqarsimasunut kinguneqartitsisoqareersimasoq, taakkulu atorfilittaasimasut nalunaarusiami isornartorsiorneqartut suliunnaareersimammata. Taamaakkaluartorli illuatungiliuttut borgmesteri atorfilittallu politiinut tunniunnissaanik siorasaarinerat tupigusuutigaa.
”Pissutsit equngasut nalunaarusiami tikkuartorneqarput, aamma ilisimalluinnaqqissaarpara isornartorsiorneqarnissara piareersimaffigissallugu. Taamaakkaluartoq misissueqqissaarnermi pineqartut uanga borgmesterinngunnginninni pisimasuupput, taamaammallu isumaqarpunga inuttarsiuinerit eqqumiitsuusut. Aamma inuit ullut tamaasa allaffeqarfimmi suliartortartut saassunneqarnerat maanna unittariaqalersut isumaqarpunga.”