Kommunalbestyrelsip pilersaarummut qinnuteqaat ”Camp Kiattua” sapaatip-akunnerini arfineq-pingasuni tamanut tusarniaassutigineqassasoq ulloq 22.02.2022 aalajangerpaa.
Siunertaq
Sanarfinermut Avatangiisinullu Ingerlatsivik Nomad Greenland-imit pilersaarummut qinnuteqaammik tigusaqarpoq.
Sumiiffik pilersaarusiorfiusoq Kapisillit avannaata tungaani kangerluttami Amitsuarsummi inissisimavoq.
Soqutigisaqartoq maannakkut sumiiffimmi tupeqarfiliorluni takornarialerinerup ilorrisimaarnartortaanut tunngasunik suliaqarluni aallartereerpoq. Inuilaami misigisaqarnissaq anguniarneqarpoq, kisianni ilorrisimaarnartumik peqatigitillugulu pinngortitamut qanittumiinnermik. Najoqqutassiami tassani pilersaarusiamut atortuni allaaserineqarpoq aamma siunissamut kissaataasoq.
Kisianni pilersaarusiamik piginnittup kissaatigaa ilutsit aalaakkaanerusut ullumikkumit ataavarnerusussat sanaartorneqarnissaat, taakkununnga ilanngullugit pingaarnertut illutassaa, neriniartarfeqarlunilu isersimaartarfeqartussaq.
Tupernut nutaanut katillugit ilutsit arfinillit qinnuteqaatigineqarput, tassaasut aniinganeq aneerasaartarfik ilanngullugu silami uffarfittalik, aammalu uffarfimmut perusuersartarfimmullu atasuliaq, tassani tupermi ataatsimi atortut tamarmik ukiukkut uninngatinneqarsinnaassallutik. Tassunga ilanngullugu pingaarnertut illutassaanut kiisalu seqernup qinngornerinik tigooraassutip puttasullu inissisimaffissaannut nunaminertanik atuinissamut qinnuteqaateqartoqarpoq. Ungasinnerusoq eqqarsaatigalugu pilersaarusiap allinissaanut toqqit arfinilinnik ilanissaat + taakkulu ilusissaat qinnuteqaataavoq.
Inatsisartut inatsisaat nr 34, 9, decembari 2015-imeersoq malillugu nunaminertamik inniminniisoqarnissaa, kingorna nunaminertamik atugassinneqarnissaq siunertaralugu, qinnutigineqarpoq.
Suliap ingerlanissaa imatut allaaserineqarsinnaavoq:
- Aningaasaliisussap/Suliffeqarfiup pilersaarummut qinnuteqaatini Kommunalbestyrelsimut nassiutissavaa, piumasaqaataavorli aningaasaliisussap pilersaarusiornermi tunngavigineqartoq nammineq suliarissagaa aammalu kingorna avatangiisinut tunngatillugu naliliinerit, assersuutigalugu VVM-it nammineq isumagalugit.
- Kommunalbestyrelsip pilersaarut akuerissavaa, ikinnerpaamillu sapaatit akunnerini arfinilinni tusarniaassutigissallugu, tassunga ilanngunneqassapput Kommunalbestyrelsip qinnuteqarnissamut piumasaqaatai, taakkulu piviusorsiortuussapput kinaassusersiortuunatillu.
- Tusarniaanermi innuttaasut tusarniaassummut akissuteqarsinnaapput, akerliliissuteqarsinnaapput imaluunniit allanik pilersaarutaasinnaasunik tunniussaqarsinnaallutik.
- Qinnuteqaatit tunuliaqutigalugit Kommunalbestyrelse piviusorsiortumik kinaassusersiortuunngitsumillu pilersaarummik pitsaanerpaamik toqqaassaaq.
- Tamatuma kingorna aningaasaliisussaq ukiuni marlunni sivisussuseqarsinnaasumik nunaminertamik inniminniinissaminik periarfissaqalissaaq kommunimullu pilersaarummut tapiliussap suliarineqarnera aallartissaaq. Nunaminertamik atuinissamut inniminniinerup nalaani, immikkoortoq pillugu soqutiginnittoq nammineerluni kommunimut pilersaarummut tapiliussaliussaaq, pilersaarusiassallu angissusaa assigisaaluunniit peqqutaallutik avatangiisinut tunngatillugu nalilerneqartariaqarpat, soqutiginnittoq SMV-mik suliaqassaaq, tassa avatangiisinut naliliinermi periaasissaq, imaluunniit VVM-imik.
Pilersaarusiornermut inatsit naapertorlugu pilersaarutit kommunimut pilersaarummut imaluunniit politikkikkut takorluukkanut allanut naapertuutinngippata qaqugukkulluunniit Kommunalbestyrelsimit itigartitsissutigineqarsinnaapput.
Tamanut saqqummiussineq
Siunnersuut tamanut tusarniaassutigisassanngorlugu sapaatit-akunnerini 8-ni saqqummiunneqassaaq piffissami 02.03. – 27.04.2022.
Piffissami tusarniaaviusumi siunnersuut pillugu oqaaseqaateqartoqarlunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi ulloq 27.04.2022 nallertinnagu tiguneqareersimassaput nassiunneqassappullu uunga Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunnit mailikkut: plan@sermersooq.gl
Piffissarititap iluani oqaaseqaatit akerliliissutillu tiguneqartut kommunimut pilersaarummut tapiliussap Kommunalbestyrelsip inaarutaasumik suliarineranut ilaatinneqassapput.
Illuliornissamut pilersaarut uani atuarneqarsinnaavoq Illuliornissamut qinnuteqaat kommunip nittartagaani Kommunimut pilersaarummut tapiliussamut siunnersuut kommunip nittartagaani, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.