Angerlarsimaffeqanngitsunut suleriaasissami matumani Kommuneqarfik Sermersuumi angerlarsimaffeqanngitsunut tunngatillugu siammasissumik suliniuteqartoqarnissaanut aqqutissiuussisoqarpoq. Ullumikkut Kommuneqarfik Sermersuumi angerlarsimaffeqanngitsut 460-it missaanniipput, taakkunannga 80 procentit missingi Nuummiillutik. Inuit angerlarsimaffeqanngitsut imaanngilaq aqqusiniinnarmi najugaqartuusut. Inuit tamarmik, aalajangersimasumik najugaqanngitsut imaluunniit tulliani sumi unnuissanerlutik nalornisartut, angerlarsimaffeqanngitsutut taaneqartarput. Issittumi angerlarsimaffeqanngitsuuneq sakkortuumik aqqusaagaqarfiusarpoq, angerlarsimaffeqanngitsullu tamarmik amerlavallaarput.
Angerlarsimaffeqanngitsuuneq ajornartorsiutaavoq, immini inuttut ilungersuaffiusartoq, assigiinngitsorpassuarnik pinngitsuuisinnaannginnerup kingunerisaanik ajornartorsiummik aaqqiiniartilluni, ajornartorsiutit allarpassuit qulaajarneqartariaqartarput, tamakkulu aamma aaqqinneqartussaallutik. Angerlarsimaffeqanngitsuuneq immini kisimi inissaaleqinermut tunngasuunngilaq, aammali apeqqutaasarput atornerluisuuneq, inuttut ajornartorsiuteqarneq, tarnikkut napparsimasuuneq peqqutaasartullu allarpassuit pineqartarput. Taamaattumik angerlarsimaffeqanngitsuunermut peqqutaasut ataasiinnarmut tutsinneqarsinnaanngillat, kisiannili peqqutaasartut ajornakusoortut ajornartorsiutip qiterpiaanik tikisersinnaanngisavut tassaniittarput. Taamaammat inaavillugu aaqqiissuteqartoqarsinnaaneq ajorpoq. Taarsiullugu aallaavigineqassapput, tamatigut angerlarsimaffeqanngitsut immikkuullarissuuneri aammalu suliniutit suleqatigiissutissallu amerlasuut sulinermi atorneqartariaqarlutik.
Kommuneqarfik Sermersuumi angerlarsimaffeqanngitsunut suleriaasissaq pingaarnertut sisamanik qulequtaqarpoq, taakkulu erseqqissaatitaqarlutillu suliniutinut suliassanullu atuutilersinneqassapput, angerlarsimaffeqanngitsut ikilisarneqarnissaannut aammalu angerlarsimaffeqanngitsut inuunerminni pitsaasunik atugaqarnissaannut pitsanngorsaatissanut anguniakkanik piviusunngortitsissutaassallutik. Qulequttat sisamat ukuupput:
– Tamakkiisumik inuttut atugarisatigut suliniuteqarneq
– Angerlarsimaffeqanngitsunut iliuusissatut pilersaarusiornerit
– Atituumik suleqatigiinnerit ataatsimoorussinerillu
– Sullinneqartunik sulisut ilinniarteqqinneqartarnerat