Aningaasaqarnermut Inuussutissarsiornermullu Ataatsimiititap 20. februaari 2020 ataatsimiinnermini aalajangerpaa Kommunimut pilersaarummut tapiliussatut siunnersuut 1C39-1 sapaatip-akunnerini 8-ni tamanut tusarniaassutigineqassasoq.
Siunertaq
Kommunimut pilersaarummut tapiliussatut siunnersuummi immikkoortup ilaani pioreersumi 1B1-imi nutaamik immikkoortup ilaanik, 1C39, atugassiisoqarpoq. Immikkoortup ilaa nutaaq C-tut qitiusumik atorneqarsinnaasutut atugassiissutigineqarpoq, tassani kikkunnilluunniit ornigarneqartartunik illoqarfiup qeqqani atuuffinnut tunngasut pilersinneqarsinnaallutik. Taamaalilluni kommunimut pilersaarummut tapiliussatut siunnersuut Sømandshjemmet pioreersup allilerneqarnissaanut nutarterneqarnissaannullu periarfissiivoq. Sømandshjemmimut atasumik sanaartorfissanik nutaanik atugassiisoqarpoq, taakkulu nunaminertamik atuisinnaanermut akuersissuteqareersumit taamaallaat atorneqarsinnaassapput.
Ineqarfinnik nutaanik marlunnik, isumasioqatigiinnermut atatillugu inimik kiisalu pisortap inissaanik il. il. sanaartornissamik periarfissiisoqarpoq.
Immikkoortup pitsaassussaata nalilerneqarnera, qaqqamut immamullu isikkivik, silamiittut pitsaasut silamilu uninngaartarfiit toqqammavigalugit siunnersuusiortoqarpoq.
Siunnersuummi immikkoortup atorneqarsinnaaneranut tunngatillugu attaveqaatit, qaqqami immikkuullarissumik inissisimanera, kiisalu siunissami atorneqarnissaanut kissaataasut eqqarsaatigineqarput.
Tamanut saqqummiussineq
Siunnersuut tamanut tusarniaassutigisassanngorlugu sapaatip-akunnerini 8-ni saqqummiunneqarpoq piffissami 04. marsi – 29. apriili 2020.
Piffissami tusarniaaviusumi siunnersuut pillugu oqaaseqaateqartoqarlunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi ulloq 29. apriili 2020 nallertinnagu tiguneqareersimassapput nassiunneqassappullu uunga Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunnit mailikkut: plan@sermersooq.gl
Piffissarititap iluani oqaaseqaatit akerliliissutillu tiguneqartut kommunimut pilersaarummut tapiliussap Kommunalbestyrelsip inaarutaasumik suliarineranut ilaatinneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussassatut siunnersuut kommunip nittartagaani www.sermersooq.gl tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.