Aninagasaqarnermut Inuussutissarsiornermullu Ataatsimiititap apriilip 21-ianni 2020 aalajangerpaa, kommunimut pilersaarummut tapiliussatut siunnersuut 1A5-2 tamanut tusarniaassutigineqassasoq.
Siunertaa
Kommunimut pilersaarummut tapiliussami aalajangersarneqarpoq immikkoortup ilaa 1A5 inissiaqarfiussasoq ilaqutariit ataatsit illuinik illullu affarleriikkaanik sanaartorfiusoq. Maannakkorpiaq kommunimut pilersaarummut tapiliussamut tunngatillugu piffimmi pisiniarfimmik kioskimilluunniit ingerlatitsisoqaqqusaanngilaq
Immikkoortup ilaani, illuliortaatsip illullu angissusianik, pisoqqamit nutaamut ikaarsaariarnertaanik ersersitsisumik atatitsisuussaaq. Sanaqqinneqarnerani nutaamilluunnit sanaartornermi illut aappaa affaanik quleriiussapput. Nunami sananeqarnissaa ajornanngippat naqqup ataani inimik atorneqarsinnaasumik sanasoqarnissaa akuersissutigineqarsinnaavoq.
Sanaartorfissaq ataaseq inissiamut pisortanit pigineqartumut sanaartorfiusussanngortinneqarpoq. Sanaartukkat pioreersut eqqaanni sanaartorfissat sanaffissanngortinneqassapput, pioreersunik alliliinissamut imaluunniit isateriarlugu sanaartornissamut periarfissiisumik. Nunaminertaq sanaartorfissaq ataaseq 150 m2 angissuseqarpoq taannalu 1½ -mik quleriiussaaq.
Tamanut oqallisissiaq
Siunnersuut tamanut tusarniaassutigisassanngorlugu sapaatip‐akunnerini 6‐ni saqqummiunneqarpoq piffissami 29. apriili-10. juuni 2020.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput juuni 10-at 2020 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani takuneqarsinnaavoq
Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluunniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.