Tasiilami nunaqarfiinilu inissianik inuusuttunut naleqqussakkanik sanaartornissamik killissimaneranik tipisiuineq

Asasarput Kommunalbestyrelsimi ilaasortaq, Laura Táunâjik Uitsatikitseq

Siullermik apeqqutigisannut qujanarujussuaq.

Ulloq 25. januaari 2019 “Pineqartoq: 04H-mi siunnersuutip Kommunalbestyrelsimit akuersissutigineqarsimasup killiffia” pillugu allaffeqarfitsinnut apeqquteqaateqarputit. Apeqqutitit makkuusut Suliffeqarfimmut Kiffartuussivimmit tiguneqarput:

1. Siunnersuut akuersissutigineqareersoq sumut killippa?
2. Qaqugu tigussaasumik takussaasumillu suliaq aallartinneqassava?
3. Aningaasat immikkoortinneqareersimappat?
4. Sanaartorneq qaqugu siunnersuummut tunngatillugu aallartinneqarniarpa aamma nunaqarfinni?

11. juuni 2019 KB ataatsimiinneranni akuersissutigalugu aalajangiiffigineqarpoq siunnersuut Sanarfinermut Avatangiisinullu ataatsimiititamut ingerlaqqissasoq. Akuersissutigineqarneratali kingorna ulloq manna tikillugu takussaasumik allakkatigut suliamut tunngasumik takussutissaqanngilaq.

Tamanna maannamut akuersissut arlaannaatigulluunniit aallartinneqarsimanngippat suna tunngavigalugu suliaq unitsiinnarneqarsimanersoq nassuiaqqunarpoq.

Imaaginnanngilarmi nunaqarfinni inuerussaaneq anguniarlugu inuusuttut allanut nutserartartut, namminneq kissaataat anguniagaallu tassaasarsimagaluarpoq ineqarneq namminerlu pilersorsinnaanermik alloriaqqinneq. Tamanna politikkikkut annerusumik soqutigineqarsimanngittutut nalilerneqarsinnaavoq. Naatsorsuutigisariaqaraluarpormi siunnersuutip akuersissutigineqarnerata kingorna aningaasat immikkoortinneqareersimassasut, tassanngaanniillu sanaartornissaq pilersaarusiorllugu aallartinneqareersimasussaagaluarpoq.

Illoqarfinni soorlu Nuuk annerpaamik inissatigut sanaartorfiuvoq, naak oqartoqarsinnaagaluarpoq pissusissamisoortoq, taamaattoq kommunetta iluani illqarfinni minnerunngitsumillu nunaqarfinni inissialiorneq ukiuni arlalinni toqujartuinnarsimavoq. Allaat kaattarpalaannguilluunniit tusarsaajunnaarsimapput, naak maannamut illoqarfik Tasiilaq aalisarnikkut tunisassiorfeqanngimmat nunaqarfiup aalisarnikkut ineriasaanera kisimi ingerlanneqaraluartoq.

1. Siunnersuut akuersissutigineqareersoq sumut killippa?

Sanaartugassanut missingersuutit pioreersut iluanni Tasiilami qulinik inissialiortoqarnisaanut akuersissuteqartoqarlunilu immikkoortitsisoqareernikuuvoq. Taakkununnga sanaartorfissagissaanissaq ukioq manna neqeroorutigineqarnikuuvoq, entreprenørimillu isumaqatigiinniarneq aallartereerpoq. Sanaartorfissagissaaneq naammassereerpat inissialiassat qulit suliarineri aatsaat aallartissaaq.

2. Qaqugu tigussaasumik takussaasumillu suliaq aallartinneqassava?

Entreprenørip isumaqatiginninniarfiginerata ukioq manna naammassineqarnissaa naatsorsuutigineqarpoq, tamakkiisumillu sanaartorfissaanertavia 2021-mi upernakkut naammassissangatinneqarluni. Tamakkua saniatigut, piffissaq sanaartorfiusussaq sivikillisarniarlugu inissiat katitertakkat suliarineqarsinnaanersut allaffeqarfiup misissorpaa.

3. Aningaasat immikkoortinneqareersimappat?

Sanaartugassanut missingersuutini pioreersuni Tasiilami inissialiornerup 2021-mi aallartinenqarnissaa sulissutigineqarpoq, piffissamilli pilersaarut taanna piviusorsiorunnaarpoq, taamaattumillu sanaartorfissagissaanissap kingusinaarnissaanut peqqutaavoq. Tamatuma kingunerisaanik, pilersaarut 2021-24-mut Missingersuutissatut siunnersuutini ukiumik ataatsimik kinguartinneqarpoq, 2022-mi pisussanngorlugu.

4. Sanaartorneq qaqugu siunnersuummut tunngatillugu aallartinneqarniarpa aamma nunaqarfinni?

Tasiilami sanaartorfissagissaanissaq 2021-mi ingerlanneqartussatut pilersaarutigineqarpoq, inissiallu sanaartorneqarnissaat 2021-p naalernerani aallartittussatut naatsorsuutigineqarpoq, imaluunniit 2022-p aallartisimalernerani. Taakkununnga aningaasaliissutit 21-miit 23-p tungaanut ingerlassapput, aallaaviatigullu Tasiilami inissialiornissamut atugassatut eqqarsaatigineqarlutik. Sanaartugassanut missingersuutinit 24-miit siunissaq ilanngullugu Tasiilami immaqalu sinerissami inissialioqqinnissamut aningaasaliissutit ilaqqinneqareerput.

Inussiarnersumik inuulluaqqusillunga
Hans Henrik Winther Johansen
Sanarfinermut Avatangiisinullu Ingerlatsivimmi pisortaq
Kommuneqarfik Sermersooq