Nunaqarfimmi aqutsisut ulluinnarni periarfissaqanngitsunik aasarsiortitsipput.
Danmarkaajip sissaata sioraani inersimasunut beach football meeqqanullu pattaatsitsineq, Kulusummi innuttaasut aasaanerani sammisassaasa ilagisimavaat.
Asimi sioraannaasumik sissalimmi – Kulusummi eqqaanilu inuit Danmarkaajimik taasagaanni, Kulusuup eqqaani Kulusummi, Tiilerilaami Isertumilu nunaqarfimmi aqutsisut, innuttaasunut pittorluttunut angallateqanngittunullu aasarsiortitsisimapput. “Siorna fritidsklubbip aaqqissuussaanik aasarsiortitsisoqarsimanera isumassarsivigisimavarput. Taanna innuttaasunit assut nuannarineqarsimavoq ukioq mannalu anginerulaartumik aaqqissuusserusussimavugut,” nunaqarfimmi aqutsisut siulittaasuat Justus Poulsen oqarpoq.
Kulusummiut, Tasiilarmiut eqqaanilu nunaqarfinneersut 100-t missigi aasarsiortitsinermut peqataapput, aappaagulu assiganik aaqqissuussisoqaqqinnissaanik qilanaalereerput. Siornami fritidsklubbi asimi aasarsiortitsimmalli oqaluuserineqartarsimavoq ukioq manna aamma taamatut aaqqissuusseqqittoqassanersoq.
Danmarkaajimi timersuutinik pinnguarnerup saniatigut innuttaasut taqussaminnik nereqatigiissimapput; puisit arferullu neqai panertut saarulliillu. Fritidsklubbi nunaqarfimmilu aqutsisut qallersukkanik aamma nassarsimapput peqataasunut agguaanneqartunik.
Nunaqarfimmi aqutsisut 2018-mi nunaqarfinnut aningaasaliissutinit 20.000 koruuninik asiliartitsinermut atugassanik qinnuteqarsimapput. Julip 28-iani umiatsiat 10 missaat Kulusummiit Tiilerilaamiillu, nunaqarfiit taakkua akornanni asimiissimapput. Tassani aningaasaliissutit pingajorarterutaat kisimik atorneqarsimammata, 18. august aasarsiortitseqqissallutik nunaqarfimmi aqutsisut aalajangersimapput.
Justus Poulsen naapertorlugu aappaagu aasarsiortitseqqinnissaq innuttaasut naatsiorsuutigiumaarpaat.