IKUMA Music Festivali siullerpaaq Tasiilami tallimanngornermi nuannersumik tunniussaqarpoq. Nipilersornermik festivali innuttaasunik ukioqatigiiaannik tamaginnik ullormik nipilersornernik ataatsimooqatigiinnermillu nuannersunik imalimmik inunnik katersuutsitsivoq.
Nipilersornermik tusarnaartitsisut
Ullormi pikkunarnerpaatut taaneqarsinnaasut ilagaat Rasmus Lyberth, Small Time Giants aamma Lysteriet tusarnaartitsinerat, taakkua tamarmik illoqarfiup arsaattarfiani tusarnaarianit qiimmaallatsitsinerujussuarmik pilersitsipput.
Festivali sioqqullugu nipilersoqatigiit marlunnik inuttallit Lysteriet meeqqanut inuusuttunullu nipilersorneq pillugu workshoppertitsipput, IKUMA-mik ingerlatsinissamut pilersaarutip ilaattut. Kalaallit nipilersortartut tusaamasat akornanni nipilersorfimmut qaqeqataanissaminnut periarfissartik sioqqullugu workshoppimik ingerlatsinermi peqataasut nipilersornermik takutitsinermillu sungiusarnissaminnut periarfissaqartinneqarput.
Najukkami pigiliunneqartoq, kommunimit tapersersorneqartoq
Festivalimut tunngaviliisut inuit sisamat tamarmik Tasiilami peroriartorput; Carl Florian Sørensen, Mathias Stenbakken, Pappi Zaki Henriksen aamma Paakkannaq Henriksen. Isumassarsiaq meeqqanut inuusuttunullu nipilersornermik workshoppertitsinertut tusarnaartitsinertullu aallartittoq, nipilersornermik festivalinngorluni ineriartorpoq.
Festivali Kommuneqarfik Sermersuumit aningaasatigut taperneqarpoq Aningaasaateqarfik Sermeq aamma Tasiilami Kultureqarnermut immikkoortortaqarfik aqqutigalugit. Ilanngullugu kommune kiisalu Tasiilami Najukkami Ataatsimiititaliaq atortulersuutinik, atortunik suliatigullu ikiuunnermik kiisalu aaqqissuussinermik ingerlatsisoqarnissaanut piumassutsiminnik ikiuuttut ataqatigiissaarneqarnerannik tapersersuivoq.
“IKUMA-p festivalitut ineriartortinneqarnera takullugu isumassarsinarpoq, pikialaartitsineq Tasiilami nipilersornermut atugassarititaasunik nutaanik kusanartunillu pilersitsisoqarpoq. Festivali illoqarfimmi innuttaasunut tikeraanullu misigisarpassuarnik nuannersunik tunniussivoq ataatsimooqatigiinnitsinnullu nukittorsaataalluni. Suliniummik tapersersuisimanerput assut nuannaarutigaarput,” nunap immikkoortortaani Tunumi pisortaq, Hjørdis Viberg oqarpoq.
Kommuneqarfik Sermersooq aningaasatigut tapersersuivoq, Tasiilami Najukkami Ataatsimiititaliaq aamma Tasiilami Sammisassaqartitsinermut Kulturimullu immikkoortortaqarfik ikiuupput. Tassunga ilanngullugu festivali aningaasaleeqataasut suleqatigisallu arlallit tapersersuinerisigut piviusunngortinneqarpoq. Kommuneqarfik Sermersuumit nuannaarutigineqarpoq Kalaallit Nunaanni Rigsombudi, Greenland Airports, Hotel Hans Egede, NunaFonden, Grønlandsbanken, Icelandair, Arctic Wonderland Tours, Tækker, ATA, Tasiilaq Renovation kiisalu Bendt Duus aamma Patrick Abrahamsen festivalip ingerlanneqarsinnaanerannut ilanngussaqaqataammata.
Festivali naggaserlugu najukkami erinarsoqatigiit Inngeratsiler nipilersorfimmut qaqillutik tusarnaartitsipput. Kommuneqarfik Sermersuumit aaqqissuussisut, festivalimi kajumissutsiminnik ikiuuttut allallu festivalimik piviusunngortitsisinnaanermut suliniummut tunniussaqataasut qutsavigineqarput.
