Borgsmesteri Avaaraq Olsen aamma Sipisap eqqaani angerlarsimaffeqanngitsut pillugit kommunip suliaqarnera pillugu KNR-imi allaatigisaq Kommuneqarfik Sermersuumit qisuariarfigineqarpoq. Kommuneqarfik Sermersuumi isumaqartoqarpoq, borgmesteri apersorneqarnissaanut pilersaarut sooq ingerlanneqarsimannginneranik allaatigisap qulequtaa aamma oqaaseqatigiit eqqunngitsumik takussutissiisoq.
Ulloq 17. juuli KNR-imit allaatigisaq qulequtserlugu ”Borgmesteri angerlarsimaffeqanngitsut pillugit apersorneqarusunngitsoq: Kommuni allakkamik nassiussisoq” Saqqummiunneqarpoq. Taamatuttaaq allaatigisami KNR allappoq borgmesteri apersorneqarnissaminut neriorsuisimagaluartoq ”kisianni taassuma apersorneqarnissani kissaatiginngilaa”.
Kommuneqarfik Sermersuumit nalilerneqarpoq, suliap ingerlaneranut uppernarsaatitalimmut naapertuutinngitsoq.
Borgmesteri aallaqqaammut apersorneqarnissaminut akuersivoq
KNR-i borgmesteri Avaaraq Olsen suliaq pillugu apersornissaanut kissaateqarluni ulloq 16. juuli borgmesterip allaffeqarfianut saaffiginnippoq.
Borgmesterip allaffeqarfianit saaffiginnissut akuerineqarpoq, KNR-ilu piffissamik aalajangersimasumik tunillugu tassa aqaguani nal.11:00.
Taamaattumik borgmesteri aallaqqaammulli apersorneqarusussimanngitsutut saqqummiunneqarnera eqqortuunngilaq.
Borgmesterip allaffeqarfiani suliaq pillugu sukumiinerusumik paasisaqartoqarmat nalilerneqarpoq, borgmesteri innuttaasut pineqartut ataasiakkaat inuttullu atugaat pillugit oqaaseqarsinnaanngitsoq. Taamaattumik KNR paasitinneqarpoq, suliaq taanna pillugu apersuineq ingerlanneqarsinnaanngitsoq kommunimiillu allaganngorlugu akissummik nassiussisoqaannartoq.
Angerlarsimaffeqanngitsunut tunngasumik kommune oqaloqatiginninnissamik neqerooruteqarneq attatiinnarpaa
Attaveqatigiinnermittaaq Kommuneqarfik Sermersuumit KNR-i kommunip angerlarsimaffeqanngitsunut nalinginnaasumik neqeroorutai aamma angerlarsimaffeqanngitsunut tunngasumik sammisaqarusussappat, kommune suli piareersimasoq KNR-imut eqqumaffigeqquneqartoq allassimavoq.
Taamaattumik assigiinngissuterujussuuvoq allalluni borgmesteri suliaq aalajangersimasoq pillugu apersorneqarusussimanngitsoq aammalu borgmesteri angerlarsimaffeqanngitsut pillugit apersorneqarusussimanngitsoq saqqummiutissallugu.
– Kommunimut borgmesterimullu tusagassiuutit isornartorsiuillutik apeqquteqartarnerat ataqqivarput. Taamaaliortussaappummi. Kisianni aamma innuttaasut pisumut suliaq eqqortumik ingerlateqqinneqarneranik tatiginnissuseqarsinnaasariaqarput. Uani pisumi borgmesteri apersorneqarnissaminut akuersigaluarpoq. Suliaq pineqartoq inunnut ataasiakkaanut inuttut atugarisaanut tunngassuteqarmat apersorneqarnissaq ingerlanneqanngilaq. Assigiinngissutaat annertuvoq, Rosannguaq Rossen oqarpoq, Kommuneqarfik Sermersuumi Attaveqaqatigiinnermut Sulisunillu Ineriartortitsinermut aqutsisoq.
KNR allaatigisaq erseqqissaavigissagaat kommunimit piumasarineqarpoq
Taamaattumik Kommuneqarfik Sermersooq KNR-mut saaffiginnippoq, tusagassiorfiullu allaatigisaq erseqqissaavigissagaa piumasarineqarluni, matumani borgmesteri ”apersorneqarnissani kissaatiginngilaa” qulequtaq oqaaseqatigiillu iluarsineqassasut.
Tusagassiortut isornartorsiuillutik apeqquteqarsinnaanissaannik killilersorneqarnissaat kommunimiit kissaatigineqanngilaq. Akerlianilli inuiaqatigiinnilu tamat oqartussaaqataaffigisaanni kiffaanngissusilimmik isornartorsiuisumillu tusagassiortoqarnissaa pisariaqarpoq. Kisianni aamma tusagassiutit oqartussallu paasissutissanik ingerlanernillu sapinngisamik eqqortumik ingerlatitseqqiisarnissaat naatsorsuutigineqarpoq.
Kommuneqarfik Sermersuumit saaffiginnissutip KNR-mit akineqarnissaa utaqqineqassaaq.