IKUMA Music Festival Kommuneqarfik sermersuumit kultureqarnikkut nukittuumut eqeersimaartumullu ingerlatseqataarusuttumit aningaasatigut suliatigullu tapersersorneqarpoq. Nipilersornermik Festivali tallimanngornermi Tasiilami ingerlanneqassaaq aamma nipilersorneq, pikialaartitsineq ataatsimooqatigiinnerlu aqqutigalugit inunnik katersuutsitsissaaq. Tusarnaartitsisussat ilagaat Rasmus Lyberth.
Festivalip Tasiilami aallaaveqartup aningaasaqarnera
Ikinngutigiit sisamat Tasiilameersut festivalimut aallarniisuupput: Carl Florian Sørensen, Mathias Stenbakken, Pappi Zaki Henriksen aamma Paakkannaq Henriksen. Suliniut nipilersornermik workshoppertitsinertut aamma tusarnaartitsinertut aallartippoq, maannali festivalinngorsimalluni.
Aningaasaateqarfik Sermeq festivalimut 50.000 koruuninik tunniussivoq. Taakkua saniatigut Tasiilami Kultureqarnermut immikkoortortaqarfik festivalip aallartisarneranut 15.000 koruuninik aningaasaliissuteqarpoq.
Aningaasaateqarfik Sermeq tassaavoq Kommuneqarfik Sermersuumi ineriartortitsinermut aningaasaateqarfik, kommunimi suliniutinut sammisaqartitsinermik ineriartortitsinermillu pilersitsisunut tapersersuisoq. Aningaasaateqarfik kulturikkut sammisanik nutaaliornermik pilersitsisunit aamma kulturimik sammisallit assigiinngitsut, suliffeqarfiit namminersortut kiisalu kommunimi innuttaasut akornanni suleqatigiinnermik siuarsaallutik ingerlatsisunit qinnuteqarfigineqarsinnaavoq.
Iliuuseqarnermut pitsaasumut sulisinnaasut
Tasiilami festivalertitsinermut kommunip aningaasatigut tapiissuteqarnerata saniatigut suliatigut arlalinnik tapiissuteqartoqarpoq. Nipilersorfissaq, nerriviit, issiaviit, meeqqat pissittaartarfiat aamma nipilersornermut atortut Kommunimit atukkiunneqarput.
Nipilersornermut siunnersorti Ferdinand Sivertsen-Ignatiussen festivalimik atortunillu aaqqissuussinermut siunnersuinermik ingerlatsivoq aaqqissuussinerullu nalaani nipigissaanermut ikiuutaalluni. Tassunga ilanngullugu Tasiilami Sammisassaqartitsinermut Kulturimullu immikkoortortaqarfimmi aqutsisoq, sapinngisani tamakkerlugu sutigut tamatigut ullormi aaqqissuussiviusumi ikiuutissaaq.
“IKUMA Music Festivalimut tapersersuinerput tulluusimaarutigaarput. Festivali Tasiilami ataatsimooqatigiinnermik pilersitsissaaq, kulturilerinermut nukittorsaataassaaq aamma ataatsimoorluta kivitseqatigiikkaangatta sunik angusaqarsinnaanitsinnik ersersitsissaaq,” immikkoortortaqarfimmi aqutsisoq oqarpoq.
Ilanngullugu kajumissutsiminnik suliaqartussat ataqatigiissaarneqarnerat kommunimit isumagineqarpoq, taakkua festivalip pitsaasumik ingerlanneqarneranut ikiuutissapput.
Tasiilami Najukkami Ataatsimiititaliaq festivalimut aamma tapersiissaaq. Najukkami Ataatsimiititaliaq atortulersuutinik atukkiivoq, taakkununnga ilanngullugit grill-i, nipilersorfiullu tupertassaanik pisisimavoq taanna festivalimit atorneqarsinnaavoq.
Kulturilerinermi killiliussat pitsaasut
Tapersersuinerit katinnerat eqqarsaatigalugu Kommuneqarfik Sermersuumit kissaatigineqarpoq, Tasiilami innuttaasunik tikeraanillu ataatsimuulersitsisumik festivalimut killiliussanik pilersitseqataanissaq.
IKUMA Music Festival tallimanngornermi juulip 24-ani Tasiilap arsaattarfiani ingerlanneqassaaq, pikialaartitsinerlu nalunaaqutaq 12.00 aallartissaaq. Ullormi tassani nipilersortut ilaatigut tassaassapput Rasmus Lyberth aamma Small Time Giants.
Festivali sioqqullugu nipilersoqatigiit marlunnik inuttallit Lysteriet meeqqanut ulluni juulip 16. aamma 17-ianni kiisalu juulip 20.- aamma 22-anni meeqqanut nipilersorneq pillugu workshopertitsissapput. Matumani meeqqat ullormi festivalerfimmi namminneerlutik kalaallit nipilersortartut tusaamasat akornanni nipilersorfimmut qaqeqataanissartik sioqqullugu nipilersornermik suliaqarnissaminnut namminnerlu piginnaasaminnik ineriartortitsinissaannut periarfissinneqarput.
Festivali tusarnaarianut akeqanngitsumik peqataaffigineqarsinnaavoq. Festivali aamma ullut nipilersorneq pillugu workshoperfiusut nuannersut IKUMA-p Facebookimi quppernerani takuneqarsinnaapput.
