Kommuneqarfik Sermersuumi umimmattassat ataasinngorpat Innuttaasunik Kiffartuussivimmi makitsissutigineqassapput.
Umimmattassinneqarnissamik qinnuteqarsimasut akornanni makitsisoqassaaq, tamannalu pissalluni ataasinngorneq juulip ulluisa 20-anni nalunaaqutaq 17.00 Kommuneqarfiup Allaffiata isaariaata nalaani Innuttaasunik Kiffartuussivianni.
Qinnuteqarnissamut killigititaq tassaavoq ulloq taanna nalunaaqutaq 12.00. Attaveqaatitigut ajornartorsiorneq pissutaalluni kaammattuutigineqassaaq, Innuttaasunik Kiffartuussivimmut nammineq ornigulluni immersugassamik immersuinikkut qinnuteqartoqassasoq.
Qinnuteqartut tamarmik normumik tunineqassapput. Pappiaqqat normulersukkat makitassanut poorisamut ikineqarsimasut akornannit makitsisoqassaaq, sapinngisamillu amerlasuunit takuneqarsinnaanissaa qulakkeerniarneqassaaq. Ateq aamma normu makinneqartoq oqaatigineqassaaq.
Qinnuteqartut soqutiginnittullu Kommuneqarfiup allaffiani makitsisoqarnerani najuunnissamut tikilluaqqusaapput. Makitsineq aammattaaq kommunip Facebook-iatigut toqqaannartumik malinnaavigineqarsinnaassaaq.
Makitaasoq najuussimanngippat kommunimiit sianerfigineqarumaarpoq. Qinnuteqartut iluatsitsilluarnissaannik kissaappavut!