Tasiilami innuttaasut maajip juunillu ingerlaneranni imarsiornermut piginnaasatik pikkorissarnikkut qaffassarpaat, isumannaallisaaneq angalanerlu ukkatarineqarlutik. Suliniutip qulakkeerinneqataaffigissavaa isumannaatsumik nammanneqarsinnaasumillu Kalaallit Nunaata kangiani takornariartitsisarnissaq aammalu najugalinnut periarfissanik pitsaanerusunik pilersitsissalluni.
”Kalaallit Nunaanni Imarsiornermik Ilinniarfik suleqatigalugu pikkorissartut 17-it sapaatip akunneri sisamat ingerlaneranni pikkorissartinneqarput taamaasillutillu ilaasoqarlutik angallassisinnaanermut allagartartaarlutik. Pikkorissartut maanna Tasiilap eqqaani takornarianik angallassisinnaanngorput,” Visit East Greenlandimi takornariaqarnermi ataqatigiissaarisoq, Anna Burdenski oqarpoq.
Pikkorissarneq aningaasalersorneqarpoq umiarsuit takornariartaatsit Kommuneqarfik Sermersuumut tulannerminni akiliutigisartagaanniit. Taamaaliornikkut umiarsuarmik takornarianiit isertitsissutigineqartut toqqaannartumik inuiaqatigiinnut iluaqutissanngorlugit tutsinneqarput, pikkorissaanikkut aammalu najukkani suliffissaqartitsiniarnerup nukittorsarneratigut.
Peqataasut 16-it ilaasoqarluni angallassisinnaanermut allagartartaarnerup saniatigut imaani isumannaallisaaneq pillugu pikkorissarneq naammassivaat. Taakkunani tallimat siullermeerlutik pikkorissartut aqqanillillu ilinniarsimasaminnik aammaarlutik pikkorissaqqittut, ilaasoqarlutik angallassisinnaanermut allagartaqarnertik attatiinnarsinnaaniarlugu. Pikkorissarnerit najukkani imaani sullissisut akornanni isumannaallisaaneq piginnaasanillu qaffassaaneq qulakkeerpaat.
“Kommuneqarfik Sermersuumiit suliniutigineqarpoq takornariartitsineq najugalinnut naleqalersitsissasoq, ilinniartitaaneq, piginnaanngorsaanerit aammalu periarfissanik pitsaanerusunik pilersitsinikkut. Pikkorissarnerit ima-ittut qulakkeerinneqataassapput isumannaallisaanermut, najukkani neqeroortitsinermi pitsaanerulernerannut aammalu siunissaq ungasinnerusoq eqqarsaatigalugu Kalaallit Nunaata kangiani takornariartitsinerup ineriartortinneqarnissaanut,” Visit East Greenlandimi takornariaqarnermi ataqatigiissaarisoq, Anna Burdenski oqarpoq.
Kommuneqarfik Sermersooq peqataasut tunniussimallutik peqataanerannut qujaffigai aamma piffimmi piginnaasanik ineriartortitseqqinnissamut suleqataanissamut qilanaarpoq.
Assit: Visit East Greenland.
