Kommuneqarfik Sermersuumi Paamiuni najugaqarnissamik sungiusarfimmik neqerooruteqarneq innuttaasunik namminerisaminnik najugaqanngitsunut ingerlariaqqitsitsivoq. Heine Petersen aamma innuttaasut allat neqeroorut aqqutigalugu utaqqiisaasumik najugaqarfissarsipput.
Sulisut nammineq najugaqarfissamik sungiusaanermik ikorfartuisuusut inuunermik nammineernerulernissamut angusassallu angunissaanut malinnaaffiginnipput. Najugaqarnissamik sungiusarnissamut neqeroorut siulleq 2024-p aallartinnerani pilersinneqarpoq. Paamiuni neqeroorut 2025-mi pilersinneqarpoq, innuttaasunut arfilinnut atuulluni.
Heine nammineq angerlarsimaffeqalerpoq
Najugaqarnissamut sungiusarnermut neqerooruteqarfik Paamiuniittoq angerlarsimaffeqanngitsut unnuisarfianni Ikinngummi inimi qullerpaami inissisimavoq. Heine siorna ukioq naajartortoq najugaqarnissamik sungiusalernissamut neqeroorummut atatillugu inimik tunineqarpoq. Ukioq taanna angerlarsimaffeqanngitsuunini pissutigalugu nammineerluni angerlarsimaffeqanngitsunut unnuisarfimmut attaveqarpoq. Angerlarsimaffeqanngitsunut unnuisarfimmi unnuisartutut piffissaq ingerlangaatsiareersoq najugaqarnissamut sungiusarnermut neqerooruteqarfimmit inimi qullermi inissisimasumi inimik neqeroorfigineqarpoq.
Paamiuni innuttaasut angerlarsimaffeqanngitsunut unnuisarfimmik inimilu allermi kialaarfimmik atuisartut sumiiffimmik atuisuunermi nalaani isumaginnittuusarnissaat naatsorsuutigineqartarpoq. Taamaaliorsinnaanermillu sapiunnatik takutitsisut inimut qullermut nuunnissamik neqeroorfigineqartarput. Angerlarsimaffeqanngitsunut unnuisarfik Ikinngut angutinut qulingiluanut arnanullu arfinilinnut inissaateqarpoq. Najugaqarnissamik sungiusarnermut neqerooruteqarfik arfineq-pingasunik iniuteqarpoq.
”Innuttaasut neqeroorut aqqutigalugu inissamik ingerlaannaq neqeroorfigineqartarput aamma namminerisamik najugaqarnissamut aqqutissiuussineq ersarinnerusoq tunniunneqartarluni. Takusinnaasavullu naapertorlugit atugaannik allannguinerusarpoq,” Suliffeqarneq aamma inunnik isumaginninnermik sullissivimmi fagchef Bea Mølgaard Lennert oqarpoq.
Neqeroorut ikorfartuutaasoq
Ikinngut najugaqartunut najugaqarnissamik sungiusaanermi ulluinnarni ilusilersuinissamut sungiusaasarpoq. Tassani ilaatigut pineqarlutik angerlarsimaffimmi suliassanut tunngasut. Sapaatip akunnikkaartumik suliassanut tunngatillugu skiimaliortoqartarpoq. Tassunga tunngatillugu Heine pikkoriffeqarluareerpoq. Inaani atisat tulleriiaarluagaasumik inissitsiterluagaapput. Suut tamarmik aalajangersimasumik inissitaapput.
Namminerisamik najugaqarsinnaalernissamik anguniagaasoq anguneqarsinnaaniassammat, najugaqarnissamut sungiusarnermut neqerooruteqarfimmi sulisut najugaqartunik ikorfartuisuusarput. Tamatuma saniatigut pisortani oqartussanik ataatsimeeqateqassatillugit illersuisussatut atorneqarnissamik neqeroorsinnaallutik, soorlu sullissisunik oqaloqateqassatillugit. Najugaqarnissamut sungiusarnermut neqeroorummiittutut allatut Heine inissiaatileqatigiiffinnut akiitsoqarnermut tunngasunik isumaginnissinnaanermut sulisunit ikiorneqartarpoq. Arlalissuimmi initaaqqinniarnissaminnut ajornartorsiutaanni annerit ilagivaat. Najugaqarnissamik sungiusarnermut neqerooruteqarfimmi ini qaammammut 1500 koruuneqarpoq. Sulisut najugaqartut peqatigalugit pilersaarusiortarput, taamaalilluni ineqarnermut akiliutissaq akiitsoqaraannilu akiitsut akilersorneqarsinnaaniassammata.
”Akiligassanik akiliisarnissamut pilersaarusiornissamut ikiorneqartarnertik iluaqutigisimavaat. Maannakkut sumiiffissaqarnera ataatsimut isigalugu uannut pitsaasuuvoq. Maanilu toqqissisimavunga,” Heine Peterseni oqarpoq.
Misilittakkanik pitsaasunik annertusaaneq
Paamiuni Najugaqarnissamik sungiusarnermut neqerooruteqarfimmi init tallimat maannakkut atorneqarput. Kommunimi tamarmik Najugaqarnissamik sungiusarnermut neqerooruteqarfinni inissat amerlanerusunngortinniarlugit Kommuneqarfik Sermersuumi sulissuteqartoqarpoq.
Kommunimi aqqusinermi angalaartartoqatigiit neqeroorummik aqutsisuupput. Kommunimit nalunaarusiaq siornarnisaq naapertorlugu, ”najugaqarnermik sungiusarnermut neqerooruteqarnermik misilittakkat pitsaasuupput”, ataatsimullu isigalugu ”najugaqartut neqeroorummik naammagisimaarinnillutik”. Neqeroorut kommunimi angerlarsimaffeqanngitsunut immikkoortumut pilersaarut-ip ilagaa maannakkullu Nuummi, Paamiuni Tasiilamilu neqeroorutaavoq.
