Innuttaasunit arlalinnit piffissami kingullermi kangerlummi umiarsuit takornariartaatit angisuut pillugit ernumassuteqartoqarpoq. Kommuneqarfik Sermersuumit Namminersorlutik Oqartussanut kangerlummi zonenut immikkoortiterineq pillugu siunnersuummik nassiussisoqareerpoq, angallassisullu tamarmik piniartunik, aalisartunik uumasunillu innimisunissamik kaammattuisoqarpoq.
Piffissami kingullermi innuttaasut akornanni Nuup Kangerluani umiarsuit takornariartaatit angisuut oqallisigineqarput. Kangerlummi amerlasuunut nerisaqarfiusumi, suliffiusumi ulluinnarnilu pingaaruteqartumi umiarsuit inituallaartutut arlalinnit misigineqarpoq.
Kommuneqarfik Sermersuumit ernumassuteqarneq paasineqarpoq aamma kangerlummi takornariaqarneq tamanut inissaqartitsiffiunissaanik kissaateqartoqarluni.
Zonenut immikkoortiterinerit pillugit siunnersuutip akuersissuteqarnissaa utaqqineqarpoq
Taamaattumik kommunimit kangerluup zonenut immikkoortiterneqarnissaanut siunnersuummik suliaqartoqarpoq. Siunnersuut piniartut, aalisartut, takornariartitsisut innuttaasullu suleqatigalugit suliarineqarpoq, tassani takornariartitsinerup pinngortitamik aamma inunnut kangerlummik inuussuteqartunut ataqqinnittumik sumi qanorlu ingerlanneqarnissaanut ersarissumik killiliussaqarnissaanik qulakkeerinnittoqassalluni.
Siunnersuut Namminersorlutik Oqartussanut nassiunneqarpoq akuersissutigineqarnissaalu utaqqineqarluni. Malittarisassat nutaat atuutilernissaasa tungaanut kommune kangerlummi angallannermut maleruagassiornissamut periarfissaqanngilaq.
Angallassisunut kaammattuut
Naak inatsisit suli akuersissutigineqanngikkaluartut kommunimit kaammattuutigineqalereerpoq angallassisut takornariartitsisullu tamarmik innimiginnissasut. Borgmesteri Avaaraq Olsen oqarpoq;
“Umiarsuit piniartunut aalisartunullu kangerlummi sulisunut ungasissumiittariaqarput aamma uumasunut akornusiinaveersaartoqassaaq, pingaartumik massakkut aavarfinngungajalernerani. Kommunimit peqatigitillugu takornariartitsisut innuttaasunut ullut tamaasa kangerlummiittartunut ataqqinninnissaannik kaammattuutigineqarpoq.”
Takornariartitsineq Sermersuumi tikilluaqquneqarpoq. Suliffissaqartitsivoq isertitaqarfiullunilu aamma pinngortitatsinnik nunarsuarmut takutitsiffiulluni. Kangerlummili inuunerineqartumut oqimaaqatigiissumik ingerlanneqassaaq.