Aluu Mr. Price,
Ittoqqortoormiini innuttaasut akineqartariaqarput.
Kingullermik innuttaasunik ataatsimiisitsinissi kingorna illoqarfitsinni innuttasorpassuit apeqqummik eqqarsaateqarput:
Kina eqqortumik oqaluttuuppiuk?
Amerikami tusagassiorfinnut oqaatigaat Jameson Land tassaassasoq nunarsuarmi uuliasiorfissarsuarnut tullinnguuttunut ilaasoq. Uuliap nappartanik 13 milliardinik amerlassusillip qallorneqarsinnaaneranik oqarputit. Apersuinermi peqataaffigisanni oqarputit Kalaallit Nunaat nunarsuarmi nukissiuuteqarnikkut pilersuinermi pingaaruteqarluinnartungorsinnaasoq. Imminut tatigalutit, uppernassuseqarlutit tulluusimaarlutillu oqalupputit.
Inuilli sumiiffimmut misissuiffigerusutannut qaninnerpaallutik najugaqartut saanniileravit oqariartuutit allarluinnanngoriasaarpoq.
Suut tamarmik maanna nalorninartumiilerput.
Maanna oqarputit ilumut uuliaqarnersoq nalullugu.
Maanna oqarputit suli misissueqqittoqarnissaa pisariaqartoq.
Maanna oqarputit uuliamik qalluisoqalertinnagu kialluunniit qulakkeerlugu ilisimasinnaanngikkaa.
Oqariartuutigineqartoq sorleq Kalaallit Nunaanni innuttaasut upperissavaat?
Robert Price, Jameson Landimi oqaluttuarisaanermi pingaarutilimmik uuliaamik nassaartoqarnissaanik amerikamiunut oqaluttoq upperineqassava?
Imaluunniit Robert Price, ilumut uuliaqarneranik ilisimasaqartoqannginneranik kalaallinut oqaluttoq upperineqassava?
Oqaatigineqartummi tamarmik ilumoorsinnaapput?
Qularuteqarnak nunanut allanut oqalupputit, illuatungaanili maani nunaqartunut qularnerarlutit oqalullutit.
Qanoq inerneqassanera suli nalunarnerarlugu kalaallinut oqaluutigalutit, aningaasaliisartunut pilerisaaralutit oqalussinnaanngilatit.
Kikkunnut oqalunnerit apeqqutaatillugu oqariartuutit allanngortittarukku tatigineqarnissat naatsorsuutigisinnaanngilat.
Ernumassutiginerpaasara tassaavoq pisup kalaallinut kinguneqarnerlunnissaa, allalli aningaasarsiorluarnissaannik qilanaalereeqquneqartut.
Nunanut allanut oqalukkaangavit periarfissarpassuaqarneraasarputit. Kalaallinulli oqalutsillutit apeqqutit itinerusut apeqqutigineqaraangata nalorninartoqarneraallutit arlaleriarlutit oqartarputit.
Tamanna siulersortaanerunngilaq.
Ammasuunermillu takutitsinngilaq.
Siunissaq ilissi suliassinnit sunnerneqassappat, inuiaqatigiit akornanni tatiginninnermik taamatut pilersitsisoqarneq ajorpoq.
Ittoqqortoormiini innuttaasut uppertikkuminartuunngillat. Taakku nalunngilaat misissuineq nalorninartoqartitsisoq. Nunap iluani misissuineq imaannaanngitsoq nalunngilaat.
Taakkuli paasinngisaat tassaavoq nunani allaneersunut oqalutsillutit sooq imminut tatigineruleraluttuinnarnerit, kalaallinullu oqalukkaangavit taamaattanngitsoq.
Oqaatigisavittaaq ilagaat suliaqarfiusussat silamit pinngortitamillu annikitsuinnarmik sunnerneqarlutik ukioq kaajallallugu suliaqarfiusinnaasut. Pissutsilli piviusut allaaneroqisut Tunumik ilisimannittut tamarmik nalunngilaat.
Inuit piniariartartut nalunngilaat.
Inuit aalisariartartut nalunngilaat.
Inuit kinguaariippassuarni maani najugaqareersimasut nalunngilaat.
Taamaammat apereqqikkusuppunga:
Tuniniaarusussuseqarlutit amerikamiunut oqaluppit aamma akisussaasuujumannginnermik kalaallinut oqalullutit?
Aningaasaliisartut tusarusutaannik oqaluttuuttarpigit, kalaallillu qanoq tusartinneqarnissannik illit kissaatigisat aallaavigalugu oqaluttuuttarpigit?
Kalaallit Nunaat tuniniaanissamut siammarterivissiaanngilaq.
Ittoqqortoormiit kusassaatitut aningaasaliisartunut pilerisaarusiorfissaangilaq.
Innuttaasugullu suliffeqarfiup nittarsaanneranut peqataaginnartussiaanngillat.
Greenland Energy Kalaallit Nunaanni suliaqarnissamik kissaateqaruni, taava unneqarillunilu assigiimmik oqariartuuteqartarniarli – USA-mi aningaasaliisartut imaluunniit Ittoqqortoormiini innuttaasut saanniikkaluaruilluunniit.
Tassami tatiginninneq ilumoornikkut pilersinneqartarmat.
Maannalu Tunumi innuttaasorpassuit tusakkamik sorliup ilumoornera eqqarsaatigaat.
Kikkut salloqittarpigit, Mr. Price? Kalaallit Nunaanni innuttaasut imaluunniit USA-mi isiginnaartutit?
Ittoqqortoormiini innuttaasut akissummik eqqortumik akineqartariaqarput.
Inussiarnersumik inuulluaqqusillunga
Avaaraq Olsen
Borgmester
Kommuneqarfik Sermersooq