Ullortunermi Inuiattut ullorsiornitsinni ataatsimoornermik, tulluusimaarinninnermik kiisalu piorsarsimassuserput ileqquvullu ataqqillugit malunnartinneqarpoq.
Sila pissutaalluni ullormi aaqqissuussat ilaat ajoraluartumik ingerlanneqanngitsoortariaqarsimapput, ilaatigut ingerlaaqatigiinneq, puiseqqaanniuunneq, kiisalu Kittat Inuiaat Show. Taamaakkaluartoq aaqqissuussat allanngortinneqarnerisa kingorna ulloq nuannersumik qiimanartumillu ingerlanneqarpoq, innuttaasut tikeraallu ullormut pilersaarutinut naleqqussakkanut peqataalluarput.
Annaassisitta Oqaluffiani naalagiartoqarnerata kingorna Nuummi Katersugaasivimmi kaffillertoqarpoq. Tassani inuit amerlasuut najuupput, kaffi, tii aammalu kalaallit kaagiannik sassaalliisoqarpoq. Kuka Fleischer qilaatersorpoq nuannersumillu qiimmaallannartumik aaqqissuussinermut peqataatitsilluni, kingorna borgmesteri Avaaraq Olsen Inuiattut Ullorsiornermi oqalugiarluni. Oqalugiaataa uani atuaruk: Inuiattut ullorsiornermi borgmesterip oqalugiaataa – Kommuneqarfik Sermersooq
Inuiattut Ullorsiornermi aaqqissuussat Inussivimmi ingerlaqqipput, tassani DGI Verdensholdet timersornermik takutitsissallutik. Unnukkullu Katuami qitinnissamut aaqqissuussisoqarpoq, tassani Leillah aamma Ilannguaq, Glenn Møller aamma Tupaarnaq tusarnaarneqarsinnaapput. Aamma tamanut ammasumik scene ammajumaarpoq.
Kommuneqarfik Sermersooq innuttaasunut tamanut Inuiattut Ullorsiornermik pilluaqqusivoq aammalu ulloq immikkuullarissumik misigisaqarfiusoq pilersikkumallugu peqataasunut tamanut qujaniarluni.
Inuiattut Ullorsiornitsinni pilluaritsi – ullormit assilisat ataani takukkit.
