Paamiuni halinspektøri Kim Jakobsen Jensen fitnessinstruktøritut tassa timip aalatinnissaanut sungiusaasutut ilinniakkamik naammassinnippoq, taamaalillunilu innuttaasunut immikkut aaqqissuussaasumik sungiusarnissamut periarfissiisinnaalerluni.
Najukkami sungiusarnissamut periarfissat nukittorsarniarlugit februaarip naalernerani Danmarkimiippoq, tassani fitnessinstruktøritut sapaatit akunnerini pingasuni pikkorissarluni. Ilinniarneq kommunimit akilerneqarpoq najukkami piginnaasanik nukittorsaanermut kiisalu peqqinnissakkut neqeroorutinik ineriartortitsinermut atatillugu.
Ilinniarnerminik naammassinnereerluni Paamiuni aallartilluareerpoq. Maannamut innuttaasut arlallit sungiusarnermik aallartinnissaannut ikiorpai, ataasiakkaallu pisariaqartitaat aammalu timikkut qanoq inissisimanerat aallaavigineqarlutik. Ilinniagaq nutaaq atorlugu immikkut ittumik sungiusarnissamut pilersaarusiorsinnaavoq kiisalu ilitsersuisinnaalluni, taamaalilluni sungiusarneq toqqissisimanartumik pitsaasumillu ingerlanneqarsinnaalluni, sungiusaatit atortoralugit imaluunniit nammineq timi atorlugu.
Paamiuni innuttaasut akornanni soqutiginninneq annertooq malugineqarpoq, taamaattumillu aallartisaataasumik ingerlatsinissaq pilersaarusiorneqarpoq, peqataasut aallartilluarnissamut tapersersorneqarlutik, siunertarineqarlunilu kingorna nammineerlutik annertunerusumik sungiusarsinnaanissaat.
Tamanna neqeroorutip ineriartortinnissaanut periarfissanik pitsaasunik pilersitsivoq kiisalu tamanut timikkut aalalluarusuttunut toqqissisimanartunik sinaakkutissiilluni.
Suliniut peqqinnerulernermut inuulluataanermullu iluaqutaavoq, ilaatigut Paamiuni utoqqaat akornanni, tassanimi sungiusarnissamut soqutiginninneq annertusiartorpoq. Utoqqaat timersoqatigiiffiat Qiimmaallugu ataatsimoorlutik neqeroorummik atuisimapput, tallimanngornerillu tamaasa ullaakkut haalimi fitnessimi instruktørip siunnersuineratigut ilitsersuineratigullu ataatsimoortarlutik.