Kommuneqarfik Sermersooq Nuummi inuusuttunut toqqissisimallutik piginnaanngorsarusuttunut qitiusoqarfimmik ammaavoq.
Kommuneqarfik Sermersooq Nuummi inuusuttunut immikkut pisariaqartitsisunut Piginnaanngorsarnermut qitiusoqarfimmik aallartitsilerpoq. Tamakkiisumik isiginnilluni, inuttut qanoq ittuuneq aallaavigalugu ukioq ataaseq ingerlasumik aamma inoqateqarnikkut ilinniarnissamullu piginnaanngorsaaneq qitiusoqarfiup neqeroorutigai.
Sullinniakkat tassaapput kommunimi inuttaasut 16-it 28-llu akornanni ukiullit, timikkut, tarnikkut imaluunniit eqqarsartaatsikkut unammillernartoqartitsinertik pissutigalugu inuusuttut ilinniarfiinik naammassinnissimanngitsut aamma immikkut pisariaqartitsisut.
“Inuusuttut immikkut pisariaqartitsisut toqqissillutik tulluartumillu sumiiffigisaqarlutik piginnaanngorsarfeqarnissaat anguniagaraarput – atassuteqarnermik, qanilaarnermik aamma aaqqissuussaalluartumik ingerlatsinerit ukkataralugit,” Piginnaanngorsarnermik qitiusoqarfimmi aqutsisoq, Malene Henningsen Jensen oqarpoq.
Politikkikkut tulleriiaarineq aallaavigalugu taama periarfissiisoqarpoq. Inuusuttut namminneq piginnaasaminnik ineriartortitsinissaminnut inuunerminnilu siunnerfeqarnissaminnut periarfissinneqassapput – najugarisartik qanillugu namminnerlu oqaatsitik atorlugit.
“Una soqutigilluinnakkama ilagaat. Inuusuttut innuttaasut najugarisaanni taamatut periarfissikkatsigit nuannaarutigeqaarput,” Kommuneqarfik Sermersuumi Isumaginninnermut Inunnullu Innarluutilinnut Ataatsimiititami siulittaasoq, Justus Hansen oqarpoq.
Qitiutitsilluni ilinniartitsineq toqqissisimanartoq
Peqataasut toqqissillutik nakimaannerulernissarlu siunertaralugu suliaqaatigalutik aaqqissuussaasumik ukuninnga ilinniartinneqassapput:
- Ulluinnarni nammineq inuulernissamut ilinniarneq
- Inoqateqariaatsimik piginnaanngorsarneq
- Piginnaasanik paasinninneq aamma ilinniarnissamut sulilernissamulluunniit piareersarneq
- Peqqinneq, atugarissaarneq aamma nammineq inuunerisamut paasinninneq
- Inuiaqatigiinni aamma kulturikkut pisuni peqataaneq
Sullinniakkat ajorsarfeqarlutik misigisimakkajuttarput aamma ilinniarnissaminnut sulilernissaminnulluunnit periarfissaalatsisarlutik. Qitiusoqarfik tassaassaaq ataasiakkaanut tulluarsakkamik toqqissisimalluni piginnaanngorsarfik aamma inuttut qanilaarfiulluartoq.
“Qitiusoqarfik inuunermik naleqarnerulersitseqataassaaq, inuusuttunullu peqataasunut nammineernerulersitsilluni siunissamullu takorluugaqalersitsilluni,” Innarluutilinnut tarnikkullu nappaatilinnut Immikkoortortaqarfimmi fagchefi, Mathias Knude Brusgaard oqarpoq.
Qitiusoqarfimmi aallartittussanik toqqaaneq kommunimi sullissisut tulleriiaarinerisigut pissaaq.
Siuariarneq pingaarutilik
Piginnaanngorsarnermut qitiusoqarfik aggustip 15-i 2025 nal. 14.00-miit 16.00-ip tungaanut ammaanersiorneqassaaq.
“Inuusuttunut immikkut pisariaqartitsisunut najugarisamut qanittumi periarfissaqarneq aamma siunissaq eqqarsaatigalugu aaqqiissuteqarneq ammaanersiornermi malunnartinneqassaaq. Inuusuttut ataqqineqarlutik piviusumillu neriuutissinnissaat uatsinnut pingaarnerpaavoq – piginnaasamillu atorluarnissaannut pitsaasumik ikiornissaat,” Malene Henningsen Jensen oqarpoq.
Aallartisarnermi ikittuinnarnut neqeroorutaassammat inuit sisamat inissaqartinneqassapput.