Pujoorfiit tamarmik paaviarneqartussaapput ikuallannermik pujuliortitsinissamillu pinngittoortitsiniarluni, taamatut piumasaqarneq inatsisitigut toqqammaveqarpoq. Illuutilittut pujoorfiit paaviartinnissaanut nammineq akisussaaffigaat.
Pujoorfinnik paaviaaneq inatsisitigut piumasaqaataavoq. Taamaammat illut tamarmik kissarsuutillit toqqammaviusumik ukiumut marloriarlutik paaviartittassapput. Kissarsuuteqaruit qisuttortumik pujoorfiit ukiumut ataasiarluni paaviarneqartassaaq, ikuallannermik pujuliortitsinissamillu pinngittoortitsiniarluni.
Pujoorfiit angisuut ukiumut sisamariarlutik paaviarneqartassapput. Pujoorfiit taama ittut tunisassiorfinnit atorneqakkajuttarput imaluunniit suliffeqarfinni angisuuni.
Illuutillit paaviaanissamut piumasaqaammut malinninnersut kommunip nakkutigisarivai. Sanarfinermut Avatangiisinullu ingerlatsivik ataavartumik paaviartittoqartarnera uppernarsiumallugu misissuisarnissamut pisinnaatitaavoq.
Illuutillit pujoorfitsik paaviartissimanngikkunikku Ingerlatsivik paaviaasumut suliakkiissaaq illumillu piginnittup akiligassaq akilissavaa. Taama pisoqassappat saniatigut kr.500-imik akiligassanngussaaq suliap ingerlanneqarnerani aningaasartuutaalersumut matussusiisussamik.
Kissarsuutip salinneqarnissaa aserfallattaalinissaalu paaviaanermut attuumassuteqanngilaq. Misilittakkammi takutippaat kissarsuutip sullua amitsoq paaqalersimaneranik kingunerisaasut ilagikkajukkaat ingerlatinneralu aamma sunnerneqarsinnaasarluni.
Taamaammat kommunimit kaammattuutigissavarput paaviaanermut atatillugu kissarsuut salinneqassasoq aserfallatsaalinissamullu misissorteqqullugu ruujorilerisunut akuerisamik ilisimaarinnittumut allagartalimmut.
Nunaqarfiit Arsuk, Qeqertarsuatsiaat, Kapisillit, Isortoq, Kulusuk, Kuummiut, Sermiligaaq aammalu Tiniteqilaami kommune immikkut piareersaassuteqassammat. Taakkartukkani najugaqaruit paaviaasoqalerpat nalunaarfigineqassaatit.
Kommunip nittartagaani paaviaanermut tunngasunik paasisaqarnerorusukkuit una tooruk.