Quppernermi uani suliffissarsiortunut ikiorsiissutit pillugit piumasaqaatinut tunngasut annertunerusumik paasisaqarsinnaavutit.
Piffissami suliffeqannginnermi pisortanit aningaasaqarnikkut ikiorserneqarsinnaavutit.
Kalaallit Nunaanni kikkut tamarmik sulinermikkut imminnut pilersorsinnaasuussapput. Taamaattorli kikkut tamarmik suliffeqanngillat, suliffissaminnilluunniit nassaarsinnaanatik. Suliffissaaleqigaanni sulinikkut isertitassat qulakkeerneqarsinnaanngimmata, suliffissaaleqinermi aningaasaqarnikkut isumannartumik inissisimasoqartarpoq. Taamaattumik piffissami suliffissaaleqinermi pisortanit aningaasatigut ikiorserneqarnissaq pisariaqartinneqarsinnaasarpoq.
Suliffissarsiortunut ikiorsiissutit pisortat aningaasatigut ikiorsiissutigaat, ima atugaqarninni pisinnaasatit:
- Nammineq pisuussutiginagu piffissat ilaanni suliffissaaleqisarnerni
- Suliffimmit angerlartitsinneqarallarnerni
- Napparsimanermi
Piumasaqaatit
Suliffeerunnermi ikiorsiissutinik pissarsisinnaaniaruit:
- 18-ileereersimassaatit imaluunniit pilersuisuullutit
- Kalaallit Nunaanni inuit allattorsimaffianni nalunaarsorneqarsimassaatit
- Suliffeqareernikuusimassaatit. Ima paasillugu, sapaatit-akunnerini 13-ini kingullerni ikinnerpaamik akunnerit 182 -it akissarsiaqarlutit sulisimassaatit
Suliffissarsiortutut inissisimassaatit
Suliffissarsiortunut ikiorsiissutinik pisartagaqarnissamut suliffeqarnissamut piareersimanissat piumasaqaataavoq.Suliffissarsiortunut ikiorsiissutit Tassa imaappoq illit:
- Suliffik innersuunneqartoq akuerissavat
- Iliuusissatut pilersaarut ilinnut tunngasoq suliarineqarpat peqataassaatit
- Sulilersitsiniaanermut, suliffissaqartitaanermut imaluunniit piginnaanngorsaqqiinermut neqeroorummut isumaqatigiissutit malillugit takkuttassaatit
- Napparsimanerit qaangiutiinnartoq peqqissisimallutit nalunaartassaatit
- Suliffeqalernissamut piareersimallutit ingerlaavartumik nalunaaruteqartassaatit
Patsisissaqarnak pisussaaffitit sumiginnarukkit, aningaasanik ikiorserneqarnissamut pisinnaatitaaffiit sapaatit-akunnerini sisamani annaassavat. Taanna killilersuiffigisaalernermik taaneqartarpoq.
Paasissutissiinissamut pisussaaffik
Nammineq inuttut atugarisanni allannguuteqartoqarpat suliffeerunnermi ikiorsiissutinik pisartagarisannik atorunnaarsitsisinnaasunik imaluunniit utertitsilluni akiliuteqartussanngorsinnaanermut piumasaqaateqaammik kinguneqarsinnaasunik, tamanna Majoriamut nalunaarutigissavat. Assersuutigalugu imaassinnaavoq:
- Suliffittaarsimasutit
- Nuussimasutit
- Pisortat ikiorsiissutaannik allaanerusunik pissarsisalersimasutit
- Napparsimanerit qaangiussimasoq
Majoriaq nalunaarfigisimanngikkukku suliffissarsiortunut ikiorsiissutit pissarsiarisimasatit utertillugit ilinnut akileqquneqarsinnaapput.
Suliffissarsiortunut ikiorsiissutit annertussusaat
SIK-ip aamma Naalakkersuisut akornanni isumaqatigiissut naapertorlugu suliamik ilinniagaqarsimanngitsut minnerpaamik akunnermut akissarsiaasa 90 % -iannik akunnermut pisartagaq annertussuseqarpoq.
Piffissami suliffeqannginninni ulloq siullermit suliffissarsiortunut ikiorsiissutinik pisartagaqalersinnaavutit. PIsartakkat ikiliartortarput pisartagaqarninni piffissaq sivitsoriartortillugu.
Inuusuttut 18 – 29-t akornanni ukiullit:
- Qaammatit 6-it angullugit: SIK-p ilinniarsimanngitsunut minnerpaamik akunnermut akissarsiaritittagaasa 90 % -iannik akunnermut pisartagaq annertussuseqarpoq
- Qaammatit 6-it – ukioq 1: SIK-p ilinniarsimanngitsunut minnerpaamik akunnermut akissarsiaritittagaasa 80 % -iannik akunnermut pisartagaq annertussuseqarpoq
- Ukiup 1-it kingorna: SIK-p ilinniarsimanngitsunut minnerpaamik akunnermut akissarsiaritittagaasa 65 % -iannik akunnermut pisartagaq annertussuseqarpoq
30-nik ukiulinnut ukioqqortunerusunullu:
- Qaammatit 6-it angullugit: SIK-p ilinniarsimanngitsunut minnerpaamik akunnermut akissarsiaritittagaasa 90 % -iannik akunnermut pisartagaq annertussuseqarpoq
- Qaammatit 6-it – ukiut 2-t: SIK-p ilinniarsimanngitsunut minnerpaamik akunnermut akissarsiaritittagaasa 80 % -iannik akunnermut pisartagaq annertussuseqarpoq
- Ukiut 2-t kingorna: SIK-p ilinniarsimanngitsunut minnerpaamik akunnermut akissarsiaritittagaasa 65 % -iannik annertussuseqarpoq
Suliffissarsiortunut ikiorsiissutit pissarsiassavit annertussusai sapaatit-akunnerini kingullerni 13-ini qanoq sulisimatiginerit taamaallaat tunngavigalugu annertussusilerneqartarput. Taamaattorli tamanut minnerpaamik akunnerni 22-ni. ikiorsiissutit annertussusaanut aapparpit isertitai apeqqutaassapput.
Suliffissarsiortunut ikiorsiissutit kingumoortumik tamatigut ullut 14-ikkaartumik akilerneqartarput.
Napparsimanermut tunngatillugu pingaarnerusumik
Napparsimanerpit nalaani aallaavittut napparsimanerup ulluisa pingajuannit suliffissarsiortunut ikiorsiissutit pisartagarilersinnaavatit. Sapaatit akunnerini 2-nik sivisunerusumilluunniit napparsimaguit suliffissarsiortunut ikiorsiissutinik akiliisarneq napparsimanerit ulluisa siullianniit aallartissaaq.
Sapaatit akunnerini pingasuni sivisunerusumilluunniit napparsimaguit imaluunniit akulikitsumik napparsimakulasaruit, sullissisuit nalilissavaa suliffissarsiortunut ikiorsiissutinik pinak allatigut ikiorsiissutinik pissarsisassanersutit.
Napparsimatillutit Majoriaq saaffigissavat. Suliffeerunnermi ikiorsiissutinik pissaguit, nakorsamit allagartaq uppernarsaatigissavat.
Majoriaq illit pillutit nakorsamit allagartamik pissarsiniarsinnaavoq. Aamma nakorsiaruit kommunimit allakkanik nassareersinnaavutit. Nakorsamut allakkat nassarukkit, taava kommunip isumaminik nakorsamit allagartamut akiligassaq suliffeqanngikkuit akilissavaa.
Malugiuk
Suliffissarsiortunut ikiorsiissutinik pissarsiannit akileraartassaatit, soorluttaaq akileraartarnermut nammineerlutit nalunaarsuileruit suliffissarsiortunut ikiorsiissutinik pissarsiatit nalunaarutigissagitit. Suliffissarsiortunut ikiorsiissutinik pissarsisarninni sulinngiffeqarnersiutinik tigusassannik katersititaassanngilatit.
Qinnuteqaat
Suliffissarsiortunut ikiorsiissutinik qinnuteqarniaruit najukkanni Majoriaq saaffigissavat. Tassani immersugassamik immersugassannik pissaatit. Ilanngutissavatit:
- Suliunnaarninnut uppernarsaat
- Qaammatini kingullerni pingasuni imaluunniit sapaatit-akunnerini kingullerni 13-ini aningaasarsiarisimasat allagartaat
- Ilinniarsimaninnut uppernarsaatit
- Pikkorissarsimanermut uppernarsaatit
- Akileraartarnermut allagartaq
- Kontonormu:
Suliffeerunnermi ikiorsiissutinik pissarsissanersutit, paasissutissat tunniussatit Majoriamit naliliinermi atorneqassapput, aamma annertussusaata naatsorsornissaanut.
Qinnuteqaatinnut erngertumik akineqarsinnaavutit.
Suliffissarsiortunut ikiorsiissutit allanngortinneri atorunnaarnerallu
Suliffissarsiortunut ikiorsiissutit pisartagarigaanni, pisartagaqarnermut pisinnaatitaaffimmut sunniuteqarsinnaasumik allannguuteqartoqarpat Majoriaq tamanna pillugu paasitinneqassaaq.
- Suliffeqaleruit
- Napparsimanerpit nalaani suliffissarsiortunut ikiorsiissutinik pisartagaqarsimavutit napparsimajunnaarlutillu
- Sulisilluni ajoquserneq pillugu sillimmasiisarfimmit taarsiiffigitikkuit
- Angerlarsimaffiit qimakkukku aallaarlutillu
- Sivisuumik napparsimaguit aamma pisortanit ikiorsiissutinik pisartagaqaleruit
Pisortanit ikiorsiissutit
Suliffeqanngikkuit aamma sapaatip akunneranut minnerpaamik akunnerit 20-ni nalinginnaasumik sulisinnaanngikkuit, suliffissarsiortunullu ikiorsiissutinik pisartaqarsinnaanngilatit, kisiannili pisortanit ikiorsiissutinik qinnuteqarsinnaavutit Pisortanit ikiorsiissutit aqqutigalugit aningaasatigut ikiorserneqarnissannut qinnuteqarniaruit, kommunerisanni isumaginninnermi ingerlatsivimmut piffissamik inniminniissaatit.
Isumaginninnermi ingerlatsivimmi sullissisoq taannaassaaq pisortanit ikiorsiissutinik pissarsissanersutit naliliisussaq, qanorlu amerlatigisut aamma ilanngullugit nalilersinnaallugit.
Pisortanit ikiorsiissutinik qinnuteqarneq pillugu atuarnerugit
Naammagittaalliorsinnaaneq
Suliffissarsiortunut ikiorsiissutinik pissarsinissamut qinnuteqarsimaguit tamakkiisumillu ilaannakortumilluunniit itigartitaasimallutit, Isumaginninnermi Naammagittaalliuteqartarfimmut naammagittaalliorsinnaatitaavutit.
Takuuk, Isumaginninnermi Naammagittaalliuuteqartarfimmut qanoq naammagittaalliorsinnaanerlutit.