Utoqqalinersiallit sulisinnaapput
Illit utoqqalinersialittut utoqqalinermi pensionisiatit ikilisinnagit qanoq annertutigisumik akissarsiorsinnaanerlutit pillugit paasissutissat uani nassaarisinnaavatit. 2025-mut isumaginninnikkut akigititanut Takstbladi allannguutaasullu kingulliit malillugit sapinngisamik paasinarsaaniarnikuuvugut.
Tunngaviusumik aningaasartai aamma utoqqalinersianut tapi
Tunngaviusumik aningaasartai: Ukiumut 79.763 koruunit
Kisimiittunut utoqqalinersianut tapit: Ukiumut 87.012 koruunit
Inooqateqarluni utoqqalinersianut tapit: Ukiumut 48.366 koruunit
Inooqateqarluni utoqqalinersiaqanngitsumik ukiumullu maanna katillugit 3000.000 koruunit ataallugit isertitalinnut: Ukiumut 87.012 koruunit
Tunngaviusumik aningaasanut tunniunneqartartunut isertitatigut killissarititat
Illit tunngaviusumik utoqqalinersiatit ikilisinnagit ukiumut 411.540 koruunit tikillugit akissarsiorsinnaavutit.
Taakku sinnerlugit akissarsiorsimaguit, aningaasanit annertussutaasut 40 %-ii ilinnut tunngaviusumik utoqqalinersianniit ikilisiissutaassapput.
Ukiumut 610.949 koruuninik akissarsiortaruit, tunngaviusumik utoqqalinersiaqarnissannut pisinnaatitaajunnaassaatit.
Utoqqalinersianut tapinut (kisimiittunut) isertitatigut killissarititat
Tapitit ikilisinnagit ukiumut 162.934 koruunit tikillugit akissarsiorsinnaavutit.
Taakku sinnerlugit akissarsiorsimaguit, aningaasanit annertussutaasut 35 %-ii tapinnit ikilisiissutaassapput.
Ukiumut 411.540 koruuninik akissarsiortaruit, tapisiaqarnissannut pisinnaatitaajunnaassaatit.
Utoqqalinersianut tapinut (inooqateqartunut) isertitatigut killissarititat
Tapitit ikilisinnagit illit inooqatillu ataatsimut ukiumut 191.134 koruuninik akissarsiorsinnaavusi.
Katillusi taakku sinnerlugit akissarsiorsimagussi, aningaasanit annertussutaasut 22 %-ii tapinnit ikilisiissutaassapput.
Katillusi ukiumut 410.978 koruuninik akissarsiortarussi, tapisiaqarnissassinnut pisinnaatitaajunnaassaasi.
Utoqqalinersialinnut tapinut isertitassatut killissarititaasut (inooqateqarluni utoqqalinersiaqanngitsumik)
Tapitit ikilisinnagit ukiumut 162.934 koruunit tikillugit akissarsiorsinnaavutit.
Taakku sinnerlugit akissarsiorsimaguit, aningaasanit annertussutaasut 35 %-ii tapinnit ikilisiissutaassapput.
Katillugit ukiumut 300.000 koruunit sinnerlugit akissarsiortarussi, tapisiaqarnissassinnut pisinnaatitaajunnaassaasi.
Angerlarsimaffiup avataani sivisunerusumik najugaqarnermi tunngaviusumik utoqqalinersiat tapillu
Tunngaviusumik aningaasartaasa ilaat tunniunneqartussat: Tunngaviusumik aningaasartaata 46%-ii ukiumut 36.691 koruuniupput.
Tapit: 0 koruunit
Qaammammi nuuffimmi qaammatillu tulliani tunngaviusumik aningaasartai aamma tapit tamakkiisumik akilerneqartassapput.
Tapiissutit assigiinngitsut
Aningaasaqarnermut annertussusileriikkanillu tapit: Aalajangersimasumik nalilerneqartassaaq.
Innarluuteqarnermut aamma peqqiilliuuteqarnermut tapit: Aalajangersimasumik nalilerneqartassaaq.
Meeqqamut ataatsimut meeqqanut tapeq: Isumaginninnikkut akigititanut allattorsimaffimmi meeqqanut tapit pillugit immikkoortoq 6 takuuk.
Utoqqalinersiat aamma utoqqalinersianut tapit nalimmassarneri
Utoqqalinersiat aamma utoqqalinersianut tapit annertussusiliilluni naleqqussaaneq malillugu ukiumut naleqqussarneqartarput ukiullu tamaasa 1. januaarimi tamanut saqqummiunneqartarlutik.
Inatsisitigut tunngavigineqartut
Paasissutissiinerup tunngavigai, Utoqqalinersiaqarneq pillugu Inatsisartut inatsisaannit Namminersorlutik Oqartussat nalunaarutaat nr 42 14. septemberi 2023-meersoq, nalunaarut nr. 70, 20. november 2023-meersoq allannguutillu kingulliit ilanngullugit.
Annertunerusunik paasisaqarusukkuit attaveqarfissat
Apeqqutissaqartoqarpat imaluunniit paasissutissanik allanik perusuttoqarpat e-mailikkut si@sermersooq.gl -ikkut Suliffeqarnermut Isumaginninnermullu Ingerlatsivik attavigineqassaaq
Neriuppugut matuma ilitsersuutip utoqqalinersiatit sunnernagit qanoq annertutigisumik akissarsiorsinnaanerlutit pillugu paasitinnissannut ikioraatit.
Allatat kukkuneqarsinnaanerat sillimaffigineqassaaq.
(kingullermik nutarterneqarpoq martsip 27-anni 2025)