Una pillugu: Ersiinnartumi ernguttut, aanngajaarniutinik tuniniaasut nakuusertullu

Maanna aasarissivoq silamilu nuannisaarneq aallarteriivippoq. Aammali aqqusinerni toqqissisimannginnermik pilersitsivoq – ingammik illoqarfiup immikkoortuani Nuussuarmi Pisiffiup eqqaani. Pisiniarfimmit 50-100 meterinik qanitsigisumiippoq meeqqerivik “Umiaq”, ukiut tamaasa toqqissisimanissamik ujartuiuartoq. Meeqqeriviup pinnguartarfianit aalakkuttut, nilliasut suaartaattullu, ilaatigullu nakuusertoqarnera, hashimillu tuniniaanerit ersiinnarput. Pisiniarfik eqqaani ineqarfinni najugalinnit pisiniartorpassuaqartarpoq qanittuanilu Nuussuup atuarfiata eqqaani pisiniarfik alla Kamik kisiartaalluni. Biileqanngikkaanni bussernissamullu akissaqarpiarani, pisiniarfimmik allamik qinigassaqarpianngilaq taamaattumik toqqissisimananngitsoq aqqusaartariaqarpoq inuillu aalakoortut saneqquasariaqartarput. Ajornartorsiut siusinnerusukkut pipallattumik iluarsiiviginiarneqartarpoq ilaatigut “Social pedel”-imik aaqqiissuteqarnikkut. Siunissami aaqqiiviginissaanut sumiiffiit imigassartorfiunngitsut eqqaaneqarnikuugaluarput aammalu pisiniarfiup imigassanik tuniniaajunnaarnissaa kissaatigineqarnikuugaluarluni. Kommunalbestyrelsimut siunnersuuteqannginninni apeqqutit uku akissutissarserusuppakka:
1) Social pedel-imik atorfeqartitsinermi suut pitsaaqutaappat suullu pitsaanngequtaappat taamatullu aaqqiissuteqarsimaneq qanoq akeqarpa. Social pedel-imik atorfeqartitsinermi kissaatigisatut sunniuteqarsimanersoq paasissutissartaqarpa?
2) Aanngajaarniutinut katsorsaasartumik isumaginninnermilu siunnersortimik peqartoqarnissaa eqqarsaatigineqarsimava, atornerluisuunermit katsorsartinnissamik kissaateqartunik ujartuillutik isumaginnissinnaasunik? Taamaassimappat, taamatut aaqqiissuteqarnissaq sooq aallartinneqanngila, naaggaappallu sooq?
3) Imigassartorfiunngitsumik killiliinissaq qanoq illersorneqarsinnaava? Taamatut aaqqiinissaq iluatsittumik qanoq ingerlanneqarsinnaava taamatullu aaqqiissuteqarneq qanoq akeqassava?
4) Imigassamik tuniniaanermik matusinissamut suut periarfissaappat? Imigassamik tuniniaaneq allamut immikkut pisiniarfimmut nuunneqarsinnaava, imigassamik tuniniaanissamut akuersissuteqartumit pigineqaannarluni, meeqqeriviup, sunngiffimmi ornittakkap atuarfiulluunniit eqqaaniunngitsoq?

Siunertaq: Nuussuarmi illoqarfiup meeqqerivianit ineqartunillu ersiinnartumi ernguttoqartarneranik, aangajaarniutinik tuniniaasunik nakuusernermillu pissusilersortunik ajornartorsiutit uteqqiattut ataavartussamik aaqqiissutissamik nassaartoqassasoq.

Suliffeqarfimmut Kiffartuussiviup aamma Suliffeqarnermut Isumaginninnermullu Ingerlatsiviup apeqquteqaatit ima akissuteqarfigaa:

Asasara Inga Dóra G Markussen
Ersiinnartumi ernguttut, aanngajaarniutinik tuniniaasut nakuusertullu pillugit apeqquteqaatinnut qujanaq. Suliffeqarnermut Isumaginninnermullu Ingerlatsivimmiit akissuteqarput:
1) Social pedel-imik atorfeqartitsinermi suut pitsaaqutaappat suullu pitsaanngequtaappat taamatullu aaqqiissuteqarsimaneq qanoq akeqarpa. Social pedel-imik atorfeqartitsinermi kissaatigisatut sunniuteqarsimanersoq paasissutissartaqarpa?
Nuussuarmiittoq pillugu kommunip Pisiffimmik, Meeqqanut Atuarfeqarnermullu Ingerlatsivimmik politiinillu suleqateqarnera pitsaasumik misilittagaqarfigineqarpoq. Minnerunngitsumillu innuttaasunik Pisiffiup silataaniittartunik angusaqarfiulluartumik ataqqinnittumillu oqaloqateqartarneq ilanngullugu. Ilaatigut aqqusinermi ujartuilluni angalaartartut isumaginninnikkut viceværtitupajaaq ingerlasut aqqutit aalajangersimasut akulikitsumik pisariaqartitsinikkulluunniit ingerlaarfigisarpaat. Paasivarput pinaveersaartitsinermik sunniuteqartartut. Meeqqerivimmiit atuarfimmiillu ungasissumut issiavilersuinikuuvugut. Aamma pisiniarfimmiit ungasissumut. Taamaattumik aqqusinermi ujartuilluni angalaartartunut marlunnillu issiavilersuinermut annerusumik aningaasartuuteqarpugut. Pingaaruteqarpoq erseqqissassallugu nakuuserneq ikiaroornartunillu tuniniaaneq pineqalertillugit kommunip tungaaniit suliniuteqarneq unitsinneqartarmat. Taamaattoqartillugu politiit akulerutsinneqartarput.
2) Aanngajaarniutinut katsorsaasartumik isumaginninnermilu siunnersortimik peqartoqarnissaa eqqarsaatigineqarsimava, atornerluisuunermit katsorsartinnissamik kissaateqartunik ujartuillutik isumaginnissinnaasunik? Taamaassimappat, taamatut aaqqiissuteqarnissaq sooq aallartinneqanngila, naaggaappallu sooq?
Aanngajaarniutinut katsorsartinneq Allorfik aqqutigalugu Namminersorlutik Oqartussani pisarpoq aamma taakkunanngaanniit aanngajaarniutinut katsorsaasartunik suliniuteqartoqarnersoq kommunimit ilisimaarineqanngilaq. Aqqusinermi ujartuilluni angalaartartut taakkuupput sumiiffimmiittunik attaveqartartut oqaloqatigiinnikkullu tatigineqalertarlutik. Tamatuma kingorna oqaloqatigiinnermi innuttaasut paasiniaavigineqartarput sullissisoqarusunnersut. Innuttaasut arlallit sullissisumik attaveqartooreerput. Aqqusinermi ujartuilluni angalaartartut silami oqaloqatigiinneq pingaarnertut piginnaasaqarfigivaat aatsaallu pisariaqartitsineq naapertorlugu sullissisoqarneq anguneqartarpoq. Taamaatsillugu sulisut piginnaasaat taamatut atornerisigut periuseq pitsaanerpaatut isigineqarpoq. Sullissisut silami angalaartartuussatillugit sullissisutut suliat kommunimeereersullu sullissiniarneq ajornakusuussaaq. Minnerunngitsumik innuttaasorpaaluit attaveqarfigineqartareersuuneri eqqarsaatigalugit. Suliffeqarfimmut Kiffartuussiviup akissutaa:
3) Imigassartorfiunngitsumik killiliinissaq qanoq illersorneqarsinnaava? Taamatut aaqqiinissaq
iluatsittumik qanoq ingerlanneqarsinnaava taamatullu aaqqiissuteqarneq qanoq akeqassava?
Pisiffiunikup (maanna Akikip) eqqaani imigassartorfiunngitsumik killiliinissaq tassaasinnaavoq pisiniarfiup saavata taamaalillunilu meeqqeriviup Umiap eqqaata toqqissisimaffiunerulernissaa. Illoqarfiup immikkoortuani najugallittaaq sumiiffimminni pisiniartillutik toqqissisimanarnerutissavaat. Akikip eqqaani imigassartorfiujunnaarnissaata kingunerisaanik ima pisoqarsinnaavoq maanna pisiniarfiup silataaniittartut Kamiup eqqaanut nooratarsinnaasut, taamaassappallu Nuussuup Atuarfiata eqqaaniilertassallutik atuartunullu qanilligunik ajornartorsiutinik nutaanik pilersitsiviusinnaalluni. Kommuneqarfik Sermersooq maannamut imigassartorfiunngitsunik misilittagaqanngilaq aningaasartuutaasinnaasunillu misissuinikuunani, taamatulli misissuisoqassappat politikkikkut kissaatigineqaqqaassaaq. Danmarkimi kommunit ilaanni imigassartorfiunngitsunik misilittagaqartoqarpoq. Kommuneqarfik Sermersuup saaffiginnissutaanut Guldborgsundip kommunianiit akissutaat imaappoq sumiiffiit imigassartorfiunngitsut malittarisassaqartitsinikkut politiit suleqatigineqartartut. Sumiiffik nunap assitalerlugu malittarisassatigut nassuiaatitaqarpoq. Byrådimit akuersissutigineqassaaq politiinillu atuutsinneqarluni. Naak imigassartorfiunngitsunik peqaraluartoq neriniartarfinni nerisassanik sassaallernermut ilanngullugu imigassanik sassaallertoqarsinnaavoq, taamaattoq nammineq imigassaatit nassarlugit sumiiffimmiittoqaqqusaanani.
4) Imigassamik tuniniaanermik matusinissamut suut periarfissaappat? Imigassamik tuniniaaneq allamut immikkut pisiniarfimmut nuunneqarsinnaava, imigassamik tuniniaanissamut akuersissuteqartumit pigineqaannarluni, meeqqeriviup, sunngiffimmi ornittakkap atuarfiulluunniit eqqaaniunngitsoq?
Imigassaq pillugu akuersissut kommunalbestyrelsimit utaqqiisaagallartumik arsaarinnissutigineqarsinnaavoq akuersissummik pigisaqartup aqutsisulluunniit suliaminik isumannaatsumik ingerlatsinngitsutut imaluunniit inatsimmi matumani piumasaqaatit eqquutsinneqanngitsutut isigineqarsinnaappata. Imigassamik akuersissutilik immikkut pisiniarfimmik ammaanissamut kissaateqassaguni immikkut pisiniarfiup sumiiffianut imigassanik aalakoornartortalinnik tuniniaanissamut akuersissummik nutaamik qinnuteqassaaq pissutigalugu akuersissutit sumiiffinnut aalajangersimasunut atuutsinneqartarmata nuunneqarsinnaanatillu.

Inussiarnersumik inuulluaqqusilluta
Ole Jakobsen
Kommunaldirektøri

Ejner Grønvold
Suliffeqarnermut Isumaginninnermullu Ingerlatsivimmi
pisortaq