Doris J. Jensen ·
Doris J. Jensen
”Qinigaaffik kingulleq siunnersuutigigaluarpara Kommuneqarfik Sermersuumi nunaqarfinni illut aserfallassimallutik inigineqanngitsut isaterneqarnissaat anguniarlugu illut 1000 kr-nilerlugit pisiarineqassasut. Siunnersuut tunuartinneqarpoq tunngavilersuutigalugu suliaq aallartereersimammat. Taamaattumik matumuuna paasiniarpara siunertaq tamanna anguniarlugu suliaq sumut killinnersoq?”
The administration's answer ·
The administration's answer
Asasara Doris J. Jakobsen
Illut atorunnaarlutik aserfallattut isaterneqarnissaat Sanarfinermut Avatangiisinullu Ingerlatsivimmi ataavartumik sulissutigineqarput. Aningaasaliissutini assigiinngitsuni siunertamut aningaasanik qinikkat ataavartumik aningaasaliissuteqarput, taamaalillutik aningaasat isatigassanut ataavartumik atorneqarsinnaaniassammata.
Illulli atorunnaarlutik aserfallattut isaterneqarnissaasa suliariniarnerini ajornartorsiutigineqakkajuttartoq tassaavoq, illut inissiallu isateriaannaasut piginnittuisa nassaariniarneri ajornakusoortarmat. Illup inissialluunniit isaterneqarnissaa ingerlatsivimmiit aallartinniartillugu, piginnittumit pisinnaatitsissummik ingerlatsivimmi pissarsisimanissaq pisariaqarpoq. Isaterinissamut piginnittumiit pisinnaatitsissummik ingerlatsivik pissarsisimanngitsillugu, imaassinnaasoq piginnittoq pisinnaatitsissummik tunniussimanngimmat imaluunniit piginnittoq nassaarineqarsinnaasimanngimmat, isaterinissaq ingerlatsivimmiit aallartinneqarsinnaanngilaq. Isaterinissaq siunertaralugu kommune illumik inissianilluunniit pisissaguni, piginnittup nassaarisimanissaattaaq pisariaqarpoq. Tamatuma saniatigut illumik inissiamilluunniit pisiniarneq allaffissorneqangaatsiassaaq, tassami imaassinnaagami pisinissamut isumaqatigiissut aamma piginnittuunermut uppernarsaat ilaatigut suliarisariaqartut kiisalu piginnittunik nikisitsinissaq pisariaqarsinnaalluni, pisinermi isaterinissaq siunertarineqaraluarpalluunniit. Taamaattumik ingerlatsivimmiit naliliineq naapertorlugu maannamut periuserineqartartoq atussallugu pisariinnerpaassaaq, tassa isaterinissamut piginnittoq akuersiteqqaassallugu. Taamaattorli illut atorunnaartut amerlanerit isaterneqartarniassammata, isaterineq pillugu periutsip allanngortinnissaa pitsanngorsarneqarnissaalu periarfissaanersoq, ingerlatsivimmiit ataavartumik nalilerneqartassaaq.
Ukioq mannamut tunngatillugu isatigassatut sukumiisumik pilersaarutit ingerlatsivimmiit ingerlatassat maannamut ima isikkoqarput:
- Ittoqqortoormiini inissiat tallimat isaterneqarput.
- Kulusummi illut arfineq-pingasut isaterneqarnissaannut najukkami pisinnaatitsissutinik pissarsiniartoqaleruttorpoq.
- Arsummi illut arfinillit isaterneqarnissaannut najukkami pisinnaatitsissutinik pissarsiniartoqaleruttorpoq.
Inussiarnersumik inuulluaqqusilluta
Søren Pedersen
Sanarfinermut Avatangiisinullu Ingerlatsivimmi pisortaq