Mindfulness misiligummik suliap killiffia

Meeqqanut Atuarfeqarnermullu Ingerlatsiviup apeqquteqaatit tiguaa imaattoq:

” Mindfulness misiligummik atuarfimmi ingerlanneqartussaq sumut killippa?

Ilinniartitsisut pikkorissarneqarpat?

Pikkorissaanermi suliffeqarfinnik suliarinnittussarsiuisoqarpa?

Suut tulliuttutut pilersaarutaappat?

Asasarput Dorthe-Marie Mogensen-Fontain

Siullermik Mindfulness misiligummik suliap killiffia pillugu apeqqutinnut qujanaq.

Killiffik imaappoq, suliniummut allaaserinninneq 1. marsi 2023-mi akuerineqarmat suliniut atuarfimmi aqutsisut ataatsimiinneranni saqqummiunneqarpoq. Tassani atuarfimmi misiliiffiusussamik apeqqutiginnittoqarpoq. Pingaaruteqarpoq, atuarfimmi misiliiffiusussami nammineerlutik suliniut ingerlannissaanut kissaatiginnittoqassasoq tunniusimasoqarnissaa qulakkeerniarlugu.

Atuarfimmi aqutsisut ataatsimiinneranni atuarfimmit nalunaartoqarpoq, suliniummi atuarfittut misiliiffiusutut ingerlatserusuttunik. Pissutsit assigiinngitsut pissutigalugit, tassunga ilanngullugu atuarfimmi aqutsisut taarsernerat, atuarfimmut misiliiffiusussamut ukioq atuarfiusumi 2023-24-mi suliniutip aallartisarnissaata pingaarnerutinnissaa ajornakusoorsimavoq. Taamaattumik ingerlatsivimmit atuarfik alla attaveqarfigineqarsimavoq, sammisamut soqutiginnittoq mindfulnessimilu pikkorissarnermik ingerlatsereersimasoq. Atuarfiup taassuma suliniut taamaattumik tiguaa, naatsorsuutigineqarporlu matumani ukioq atuarfiusoq 2023/2024-mi aallartinneqassasoq.

Mindfulnessimi pikkorissarneq suliffeqarfimmut aalajangersimasumut suliarinnittussarsiorneqanngilaq, kisianni pikkorissarnermut qulaani taaneqartumut illoqarfimmi pikkorissaasartoq atorneqarpoq.

Ingerlatsivimmi nalileeriaaseq suliarineqarpoq, suliniummik misiliineq naammassippat atorneqartussaq.  Misiliilluni suliniutip naammassinerata kingorna naliliineq Meeqqanut Atuarfeqarnermullu Ingerlatsivimmut nassiunneqassaaq.

Ikinngutinnersumik inuulluaqqusillunga

Lone Nukaaraq Møller

Meeqqanut Atuarfeqarnermullu Ingerlatsivimmi pisortaq